Ֆրանսիայի կրթության նախարարը խոստացել է լրացուցիչ 3000 ուսուցչի ընդունել դպրոցներ
Ֆրանսիայի կրթության նախարար Էդուար Ժեֆրեն երկրում շարունակվող աշակերտական ցույցերի և բախումների ֆոնին հայտարարել է, որ 3000 լրացուցիչ ուսուցչի կընդունի դպրոցներ՝ ավագ դպրոցների վիճակը բարելավելու համար։ «Արմենպրես»-ի փոխանցմամբ՝ այս մասին հաղորդում է France 24-ը։
Նշվում է, որ նախարարը խոստացել է դա անել «առաջիկա մի քանի ժամվա ընթացքում»։
Միևնույն ժամանակ, երկրում հոկտեմբերի 9-ին դեռ շուրջ 140 դպրոց փակ է մնում. դա Ֆրանսիայի 3700 ավագ դպրոցների մոտ 4 տոկոսն է։
«Ավագ դպրոցների ավելի քան 96 տոկոսը բաց է», – նշել է Կրթության նախարարությունը հաղորդագրության մեջ։
Հոկտեմբերի 8-ին փակ էր 157 դպրոց։
Միևնույն ժամանակ, ուսանողական կազմակերպությունները կոչ են անում հաջորդ երեքշաբթի՝ հոկտեմբերի 13-ին, անցկացնել բողոքի ակցիաների «հինգերորդ փուլը», մինչ կառավարությունն ու երիտասարդության ներկայացուցիչները պայմանավորվել են շարունակել բանակցությունները։
Ըստ Ֆրանսիայի արդարադատության նախարարության՝ սեպտեմբերի կեսերից սկսված բողոքի ակցիաների ընթացքում գրեթե 7000 ցուցարար է ձերբակալվել։ Նրանց 86 տոկոսն անչափահասներ են։ 21 մարդ ազատազրկվել է։ 2376 անձի մեղադրանք է առաջադրվել։
Աշակերտները բողոքում են ծանրաբեռնված դասացուցակների, ուսուցիչների պակասի, շենքային վատ պայմանների և կրթական համակարգում առկա այլ խնդիրների դեմ։
Հետևեք մեզ Viber-ում
