Ավտոբուսի վարորդը դեպքի մասին միայն բողոքից է իմացել

Երևանի 33 համարի երթուղին սպասարկող ավտոբուսի ուղևորի մատը մնացել է դռան արանքում ու վնասվել։ Այս մասին իր ֆեյսբուքյան էջում ահազանգել է «Ձեռքդ տուր» համայնքային զարգացման ՀԿ նախագահ Անուշ Թորոսյանը։

Նրա խոսքով՝ ուղևորը արնաթաթախ իջել է ավտոբուսից, իսկ վարորդն անգամ օգնություն չի ցուցաբերել. դռները փակել ու հեռացել է։
Դրանից հետո 41-ամյա տղամարդը բարդ վիրահատություն է ունեցել, որի ընթացքում բժիշկները կարողացել են «հավաքել» նրա մատն ու փրկել այն։ Ընդհանուր առմամբ, տղամարդը հիվանդանոցային ծախսերի համար ստիպված է եղել վճարել շուրջ 350 հազար դրամ։

«Երևան ավտոբուս» ՓԲԸ-ի մամուլի խոսնակ Գեղամ Ասատրյանը Sputnik Արմենիայի հետ զրույցում նշեց՝ դեպքը տեղի է ունեցել սեպտեմբերի 24-ին՝ օրվա ծանրաբեռնված ուղևորահոսքով ժամին։ Տեղի ունեցածի մասին վարորդը դեպքի պահին չի էլ իմացել, քանի որ ուղևորը գտնվել է ավտոբուսի հետևի դռների մոտ, բռնված է եղել դռան վերևի հատվածից։ Երբ դուռը բացվել է, նրա մատը մնացել է դռան արանքում։
«Ուղևորներն ասել են՝ փակի, փակի դուռը։ Վարորդն էլ փակել է՝ կարծելով, թե հնարավոր է, օրինակ, շորը կամ պայուսակն է մնացել դռան արանքում։ Քանի որ ավտոբուսը մարդաշատ է եղել, վարորդը ֆիզիկապես չէր կարող տեսնել, թե ինչ է կատարվում։ Երբ կանգառում դուռը բացվել է, տվյալ ուղևորը մեկ ուրիշ ուղևորի հետ իջել է ավտոբուսից, ոչինչ չեն ասել, վարորդն էլ դուռը փակել ու հեռացել է»,- նշում է մամուլի խոսնակը։
Ըստ նրա՝ կատարվածի մասին իմացել են արդեն այն բանից հետո, երբ ուղևորը բողոք է ներկայացրել։ Դրանից հետո վարորդին բացատրության են կանչել, որն էլ ներկայացրել է տեղի ունեցածը։

Շարունակությունը՝ սկզբնաղբյուրում։