Կիևին հասցված ռուսական հարվածի հետևանքով երկու մարդ է զոհվել

Հոկտեմբերի 7-ի գիշերը ռուսական զինուժը անօդաչու թռչող սարքերով, թևավոր և բալիստիկ հրթիռներով հարվածել է Ուկրաինայի տարածքին։ Կիևում հարվածների տակ է հայտնվել չորս շրջան. Օբոլոնսկի և Շևչենկովսկի շրջաններում վնասվել են ոչ բնակելի շենքեր, Պոդոլսկում՝ պահեստներն ու բիզնես կենտրոնը, իսկ Դարնիցկիում՝ ավտոտնակային կոոպերատիվը, հայտնել է Ուկրաինայի մայրաքաղաքի քաղաքապետ Վիտալի Կլիչկոն։ Նրա տվյալներով՝ վերջինիս տարածքում հրդեհ է բռնկվել․ երկու հոգի փրկվել են, ևս երկուսը՝ զոհվել (նրանց մարմինները հայտնաբերվել են հրդեհաշիջումից հետո)։

Ռուսական հարձակման թիրախում է հայտնվել նաև Դնեպրը, որտեղ հարվածներ են հասցվել արդյունաբերական ձեռնարկությանը, բազմաբնակարան շենքերին ու մարզակումբին։ Մարզային ռազմական վարչակազմի ղեկավար Ալեքսանդր Գանժան հայտնել է, որ երկու մարդ է տուժել։ Զապորոժիեում հարված է հասցվել տրանսպորտային ենթակառուցվածքի օբյեկտին։ «Գնդակոծության հետևանքների պատճառով ճանապարհների որոշ հատվածներում երթևեկությունը կարող է ժամանակավորապես սահմանափակվել», — զգուշացրել է մարզային ռազմական վարչակազմի ղեկավարի ժամանակավոր պաշտոնակատար Միխայիլ Սեմիկինը։ Նա չի հստակեցրել՝ արդյոք հարվածի հետևանքով տուժածներ կան, թե ոչ։ Բացի այդ, ռուսական հրթիռները հարվածել են Պոլտավայի մարզի Կրեմենչուկ քաղաքին, որտեղ վնասվել են մեկ արդյունաբերական ձեռնարկություն և մի քանի բնակելի շենք, հայտնել է մարզային ռազմական վարչակազմի ղեկավար Վիտալի Դյակիվնիչը։ «Տուժածների մասին տեղեկությունները ճշտվում են», — գրել է նա։