«Արմեն Սարգսյանը Cadillac Escalade –ով ցանկացավ տպավորել իր շրջապատին». Սամվել Խուդոյան (հոգեբան)

ՀՀ չորրորդ նախագահի թեկնածու Արմեն Սարգսյանի խոստացած հանդիպումները երեկվանից սկսվել են: Հիշեցնենք, որ նա երեկ հանդիպել էր Հայաստանի Հանրա­պետական կուսակցության և Դաշնակցության ներկայացուցիչների հետ: Ուշագրավ է այն, որ երեկ Արմեն Սարգսյանը ՀՀԿ  գրասենյակ ժամանեց ամերիկյան հանրահայտ Cadillac Escalade  մակնիշի շքեղ մեքենայով: Հիշեցնենք, որ  վարչապետ Կարեն Կարապետյանը ևս ժամանակին նույն մակնիշի մեքենայով էր եկել ՀՀԿ գրա­սենյակ: Ի՞նչ նպատակ էր հետապնդում Արմեն Սարգսյանի այս քայլը դժվար է ասել, բայց այն, որ պաշտոնյաների «թիթիզությունները» բացասական ընդունելություն են գտնում մեր հասարակությունում՝ միանշանակ է: Թեմայի շուրջ զրուցեցինք հոգեբան Սամվել Խուդոյանի հետ: Վերջինս ասաց. «Հանրությունը Արմեն Սարգսյանի այդ քայլին դրական արձագանք չի տա: Ավելի լավ կլիներ՝ համեստ մեքենայով ներկայանար»: Հիշեցրեց, որ հանրությունը դրական արձագանքեց՝ պաշտոնյաների հասարակական տրանսպորտով  «Եռաբլուր» այցելելու փաստին, ինչը՝ ըստ հոգեբանի, կրում էր ձևական բնույթ, բայց ընդունվեց հանրության կողմից: Խուդոյանի համոզմամբ՝ «Արմեն Սարգսյանը իր մեքենայով ավելի շատ ցանկացել է տպավորել իր շրջապատին»: Հիշեցնենք, որ նախագահի թեկնածուն այսօր այցելել է Գիտությունների ազգային ակադեմիա, որտեղ՝ ինչպես նախորդ օրը, խուսափեց լրագրողների հարցերին պատասխանել և իրեն բնորոշ՝ անգլիական ձևով, հեռացավ: Քրիստինե Աղաբեկյան