Ավելի քան 20 տարի պտտվող սուտ լուր .Արմեն Սարգսյանը՝իր և Վազգեն Սարգսյանի միջև կոնֆլիկտի մասին
«Ամենը սուտ լուրերի ֆենոմեն է: Իմ եւ երջանկահիշատակ սպարապետի միջեւ որեւէ վեճ չի եղել, ես ընդամենը 4 ամիս վարչապետի պաշտոնը ստանձնելուց հետո հեռացել եմ առողջական ծանր խնդիրների պատճառով: Իմ ապաքինումը եղել է դժվար ու երկարատև՝ նախ վիրահատություն Լոնդոնում, ապա նաև մեկուկես տարվա հետվիրահատական բուժում»,-Շանթ հեռուստաընկերությանը տված հարցազրույցում պատասխանելով հարցին ,թե ինչ կոնֆլիկտ է եղել իր և սպարապետ Վազգեն Սարգսյանի միջև,ասաց ՀՀ նախագահի պաշտոնում առաջադրված Արմեն Սարգսյանը: « Իմ հրաժարականի հարցը քննարկվել է այն ժամանակվա նախագահ Լևոն Տեր-Պետրոսյանի, ԱԺ նախագահ Բաբկեն Արարքցյանի հետ, տեղյակ են եղել նաեւ Սերժ Սարգսյանը, որն այն ժամանակ Ներքին գործերի նախարար էր, ու Վազգեն Սարգսյանը, որը պաշտպանության նախարարն էր: Լեւոն Տեր-Պետրոսյաննն անձամբ է հորդորել՝ դուրս գալ եւ զբաղվել առողջական խնդիրներով: Ես կարող եմ շատերի հետ վիճել, ունենալ հակառակ կարծիք, բայց քչերը կարող են իմ վրա ձայն բարձրացնել:Այս պատմությունն արդեն ավելի քան 20 տարի պտտվում է, «սուտ լուրի» ֆենոմենն է, որը գնալով աճել է»,-նշեց նախագահի թեկնածուն:
Հետևեք մեզ Viber-ում
