Իշխանությունը տրանսպորտ է հատկացրել Տիգրանաշենին՝ տեղեկանալով «Ուժեղ Հայաստան»-ի նախաձեռնության մասին

«Ուժեղ Հայաստան» խմբակցության ներկայացուցիչների հայտարարությունից հետո, որ որոշում են կայացրել ԱԺ-ից ստացած պարգեւավճարներով Տիգրանաշենի համար ձեռք բերել տրանսպորտային միջոց, օրվա իշխանությունները շտապել են առաջ ընկնել ու տրանսպորտ են հատկացրել համայնքին։ «Փաստինֆո»-ի հաղորդմամբ՝ այդ մասին հայտարարել են խմբակցության անդամները։

Ավելի վաղ խմբակցության պատգամավորները մեկնել էին Տիգրանաշեն, եւ անկախության օրը Տիգրանաշենում նշել ծառատունկով։ Այցից հետո խմբակցությունը հայտարարեց, որ մշակել են Տիգրանաշենը մշակելու ծրագիր եւ որոշել պարգեւավճարներից գոյացած գումարով մի շարք նվերներ մատուցել համայնքին։ Ի թիվ այս ծրագրերի՝ հայտարարվել էր տրանսպորային միջոց հատկացնելու մասին։ «Մենք որոշում ենք կայացրել Տիգրանաշենի համար ձեռք բերել տրանսպորտային միջոց, որով տիգրանաշենցիներն առավոտյան ժամերին կկարողանան իրենց երեխաներին հասցնել դպրոց»,- ասել էր խմբակցության քարտուղար Տիգրան Աբրահամյանը։

Ավելի ուշ արդեն հայտնի դարձավ, որ իշխանությունը շտապել է սեփական միջոցներով համայնքին տրանսպորտ տրամադրել։
«Իշխանությունները, լսելով տրանսպորտ հատկացնելու մեր մտադրության մասին, իրենց միջոցներով կազմակերպել ու Տիգրանաշեն համայնքին հատկացրել են տրանսպորտային միջոց»,-ասել է Ղազարյանը։

«Ուժեղ Հայաստան»-ից Անդրանիկ Գևորգյանն էլ նկատել է՝ ինչպես ստիպեցին Փաշինյանին զբաղվել Տիգրանաշենի խնդիրների լուծմամբ, այդպես էլ կստիպեն Փաշինյանին կանգնեցնել Տիգրանաշենի հանձնումը։ «Վարչապետը թույլ է, ընդդիմությունը՝ ուժեղ»,-ասել է Գևորգյանը։