«Էդ ասողների լեզուն պիտի կտրես». Արթուր Ալեքսանյան

Արցախյան պատերազմի վետերան, «Ամարաս» հասարակական կազմակերպության ղեկավար Արթուր Ալեքսանյանն այսօր Հայելի ակումբում լրագրողների հետ հանդիպման ժամանակ պատմեց, որ Արցախյան պատերազմի առաջին հրամանատար, գնդապետ Արկադի Կարապետյանն է իրեն ներգրավել Արցախյան շարժման մեջ:«1987 թվականի գարունն էր, Արկադի Կարապետյանն ինձ հանդիպեց, ասացի՝ «լսել եմ, որ ընդհատակում ինչ-որ բաներ եք անում, կուզեի իմանալ՝ ինչո՞վ կարող եմ օգտակար լինել: Նա ինձ նրբությունները բացատրեց, ես իմ խումբը կազմակերպեցի, և ստորագրահավաք սկսեցինք: Մինչև 1988 թվականը մենք ստորագրություններ էինք հավաքում»,- հիշեց նա: Այնուհետև պատմեց, թե ինչպես էին գումար հայթայթում, որ զենք գնեն՝ մեկը մեքենան, մյուսը երաժշտական գործիքները, երրորդը ոսկեղենն էր վաճառում: «Մենք այն ժամանակ ինքներս էինք հավաքում, էն ժամանակ տենց բան չկար՝ սպոնսոր, բարեգործություն, ով ինչ ուներ, ծախում էր: Եթե կարողանում էինք, մենք էինք զենքն առնում, եթե չէ, փողն էինք տալիս Արկադիին, ինքը գտնում էր զենքը»,- պատմեց Ա. Ալեքսանյանը: Հիշելով ապրիլյան պատերազմի օրերը՝ պարոն Ալեքսանյանը պատմեց. «Ես այնտեղ էի, մի մեծ ջոկատ ունեի: Պատրաստ էինք ցանկացած առաջադրանք կատարել՝ ընդհուպ մինչև Կիրովաբադ և այլ տարածքներ ազատագրելու»: Այնուհետև, անդրադառնալով հողերը ծախելու հայտարարություններին, ասաց. «Էդ ասողների լեզուն պիտի կտրես»: