Ռուբեն Վարդանյանի կնոջը սպառնում են ձերբակալել. ադրբեջանագետ

Ռուբեն Վարդանյանի կինը՝ Վերոնիկա Զոնաբենդը, հայտարարել է, որ պատրաստ է մեկնել Բաքու՝ ամուսնուն տեսակցելու համար:

Ադրբեջանագետ Տաթևիկ Հայրապետյանը գրում է.

Տևական ժամանակ է՝ ադրբեջանական կողմը տարբեր մեդիա ռեսուրսներով դժգոհություն է արտահայտում Ռուբեն Վարդանյանի կնոջ՝ Վերոնիկա Զոնաբենդի՝ Բաքու այցելելու և հայ գերիներին տեսակցելու նախաձեռնության վերաբերյալ։ Սակայն այժմ սպառնալիքներն արդեն հասել են նոր մակարդակի։

Օրեր առաջ ադրբեջանական «Unikal.az» կայքում հրապարակված հոդվածում Զոնաբենդին սպառնացել են ձերբակալությամբ՝ պնդելով, թե նա կարող է մինչև 5 տարվա ազատազրկման ենթարկվել՝ 2022 թվականին Ղարաբաղ «անօրինական մուտք գործելու» համար։

Հրապարակման մեջ նշվում է, որ եթե Զոնաբենդը մտնի Ադրբեջանի տարածք, կարող է պատասխանատվության ենթարկվել նախկինում Արցախ կատարած այցի համար։

Փաստացի, ադրբեջանական կողմը նման հրապարակումներով փորձում է կանխել Վարդանյանի կնոջ հնարավոր այցը Բաքու և նրա կողմից ամուսնուն ու մյուս հայ գերիներին տեսակցելու փորձը։

Այս սպառնալիքը ևս մեկ անգամ ցույց է տալիս, որ Բաքուն շարունակում է խուսափել հայ գերիների հարցի միջազգային քննարկումից։ Մինչդեռ խնդրի մասին բարձրաձայնելը և այն միջազգային օրակարգում պահելը կարևոր նշանակություն ունի գերիների իրավունքների պաշտպանության համար։

Հատկանշական է նաև, որ Վաշինգտոնյան հանդիպումից անցել է արդեն մեկ տարի, սակայն հայ գերիների հարցը շարունակում է մնալ չլուծված։ Իսկ ԱՄՆ նախագահ Դոնալդ Թրամփը հայտարարել էր, որ զբաղվելու է այդ հարցով։ Մնում է միայն հարցնել՝ ի՞նչ եղավ այդ խոստման հետ՝ այն իրագործվե՞ց, արդյունքի չհասա՞վ, թե՞ պարզապես մոռացության մատնվեց։