Էրդողանը՝Սիրիայի հետ կապված նպատակների մասին

Թուրքիայի նախագահ Ռեջեփ Թայիփ Էրդողանը մեկնաբանել է «Ձիթենու ճյուղ» գործողությունների ընթացքն ու հայտնել, որ մի քանի անգամ հչած կարծիքները, թե Թուրքիան ցանկանում է տիրանալ Սիրիային, չեն համապատասխանում իրականությանը. «Մենք չենք ցանկանում գրավել Սիրիան, սակայն ցանկություն ունենք օգնել այն 3,5 միլիոն փախստականներին, որոնք պատսպարվել են Թուրքիայում ու չեն կարողանում վերադառնալ հայրենիք` Սիրիա»,-Haberturk-ի փոխանցմամբ, մեկնաբանել է Էրդողանը: Էրդողանը, իշխող՝ Արդարություն և զարգացում կուսակցության կոնգրեսի ժամանակ հայտարարել է, որ Թուրքիան ամբողջովին մաքրելու է Սիրիայի հետ սահմանը ահաբեկիչներից։ Նա ընդգծել է, որ հնարավորություն է տալու սիրիացի փախստականներին տուն վերադառնալ այն բանից հետո, երբ սահմանը ամբողջովին մաքրված կլինի զինյալներից,– հաղորդում է Reuters-ը։ Հիշեցնենք, որ անցյալ շաբաթվա վերջին թուրքական բանակը, Սիրիայի հյուսիսում, քրդական խմբավորումների դեմ սկսեց «Ձիթենու ճյուղ» օպերացիան։ Անկարան վճռական է տրամադրված ավարտել ուժային գործողությունը «կարճ ժամկետներում», սակայն հարձակումը միտում ունի երկարատև հակամարտության վերաճելու։