Արցախի իշխանությունը պատրաստ է ճնշումներին, բոլոր քայլերը հաշվարկում ենք․ խաղաղությունը չպետք է ստանալ ազատության հաշվին. Բաղունց
Ստեղծված իրավիճակում, նկատի ունեմ և Հայաստանում տիրող մթնոլորտը և Հայաստանի շուրջ տարածաշրջանում ընթացող գործընթացները, բավականին բարդ խնդիր ունենք Արցախի հարցը օրակարգում պահելու։ Այս մասին, այսօր՝ սեպտեմբերի 2–ին՝ Արցախի Հանրապետության օրը, Եռաբլուր պանթեոնում լրագրողների հետ զրույցում ասաց Արցախի ԱԺ նախագահի պաշտոնակատար Գագիկ Բաղունցը՝ անդրադառնալով հարցին, թե այսօր ի՞նչ քայլեր են իրականացվում, որպեսզի Արցախի անկախության հարցի առաջ մղումը պահվի թե՛ ներքին, թե՛ արտաքին քաղաքական օրակարգում։
«Այնուամենայնիվ, այսօր մենք նկատի առնելով Հայաստանի անվտանգությանն ուղղված սպառնալիքները, մենք բոլոր մեր քայլերը հաշվարկված, փորձում ենք օրակարգային պահել Արցախի հարցը։
Նշեմ, որ Արցախի հարցը ոչ միայն քաղաքական բաղադրիչ ունի, այլ նաև սոցիալ-տնտեսական, իրավական, ինչու չէ հումանիտար բաղադրիչներ, և բոլոր այդ ուղղություններով մենք փորձում ենք գործունեություն ծավալել՝ առաջնային խնդիր ունենալով արցախահայության ծանր վիճակից ելք փնտրելը։ Արցախի Հանրապետության ներկայացուցչությունում մենք բազմաթիվ հանդիպումներ ենք կազմակերպում, փորձում ենք համատեղ բոլոր այն ուժերի հետ միասին, որոնք մտահոգված են և Արցախի ճակատագրով, և արցախահայության խնդիրներով, մշակել մի քաղաքականություն, որը թույլ ի չտա մոռացության տալ Արցախը, մյուս կողմից սպառնալիք չհանդիսանա այն խաղաղության ծրագրին, որով առաջնորդվում է Հայաստանի Հանրապետության իշխանությունը»,–ասաց նա։
Բախուղը տեղեկացրեց, որ Արցախից բռնի տեղահանումից հետո Ազգային ժողովի որոշմամբ ստեղծել են Արցախի հիմնական խնդիրների պաշտպանության հանձնաժողով, որում ներգրավել են Սփյուռքի այն ակտիվ քաղաքական գործիչներին, որոնք մշտապես զբաղվել են Արցախի հարցով և այդ հանձնաժողովը ակտիվ գործունեություն է ծավալում մինչ այսօր։
«Մենք կապ ու պահպանում ենք իրենց հետ, և քանի որ սուղ հնարավորություն ունենք մենք անմիջապես ներկայանալ տարբեր միջազգային հարթակներում և այնտեղ բարձրաձայնել Արցախի բազմաթիվ խնդիրները, մենք փորձում ենք իրենց միջոցով այդ խնդիրները լուծել»,–ասաց նա։
Հարցին՝ ինչպե՞ս է գնահատում Հայաստանի գործող իշխանության քաղաքականությունը, որը նրանք կոչում են խաղաղության գործընթաց, Բաղունցն արձագանքեց. «Ես չեմ ուզում գնահատականներ տալ այդ գործընթացներին, բայց այնուամենայնիվ ասեմ, որ արցախայությունը երևի հայ ազգի ամենավառ ներկայացուցիչներն են, որոնք կողմնակից են խաղաղությանը։ Անցնելով վերջին տարիներին երեք պատերազմներով, մենք շատ լավ գիտենք խաղաղության գինը և ամեն ձև ձգտում ենք այն քաղաքականությունը վարել, որը կնպաստի երկարաժամկետ խաղաղության։
Բայց խաղաղությունը պետք է ստանալ ոչ ազատության հաշվին։ Իհարկե, որոշակի զիջումներ արվում են և դա քաղաքական պարտադրանք է, միջազգային ավելի հզոր ուժեր թելադրում են խաղի կանոնները և խաղաղությունը այդպես չէ, որ հեշտ է ձեռք բերվում, բայց այնուամենայնիվ այդ խաղաղությունը պետք է ստանալ ոչ սկզբունքային զիջումների հաշվին»։
Հետևեք մեզ Viber-ում
