Աֆրինը մաքրելուց հետո շարժվելու ենք Մանբիչ ու հասնենք մինչեւ Իրաքի սահման. Էրդողան
Թուրքիայի նախագահ Ռեջեփ Թայիփ Էրդողանը իշխող «Արդարություն և զարգացում» (ԱԶԿ-AKP) կուսակցության նահանգային ղեկավարների հետ հանդիպմանը խոսել է Թուրքիայի կողմից Սիրիայում իրականացվող ռազմական գործողություններում Անկարայի հետագա ծրագրերի մասին: Հունվարի 20-ին Թուրքիայի բանակը ներխուժել է սիրիական Աֆրին շրջան և արդեն 8 օր գործողություններ է իրականացնում տեղի Սիրիայի քրդական ուժերի դեմ: Ermenihaber-ը ներկայացնում է հատված՝ նախագահ Էրդողանի ելույթից. «Մեր գործողությունները Սիրիայում շարունակվելու են այնքան ժամանակ, մինչև հասնենք մեր նպատակին: Մեր մյուս կետը Մանբիչն է, որը մաքրվելու է ահաբեկիչներից: Մանբիչի իրական տերերը մեր արաբ եղբայրներն են: Դրանից հետո շարժվելու ենք մինչև Իրաքի սահման: Այս օպերացիան շարունակվելու է այնքան ժամանակ, մինչև ոչ մի ահաբեկիչ չմնա»: Հիշեցնենք, որ Թուրքիան Սիրիայի քրդական ուժերին համարում է ահաբեկչական: Իսկ Մանբիչը այժմ գտնվում է Սիրիայի քրդերի վերահսկողության տակ: Մանբիչում գտնվում են նաև ամերիկացի ստորաբաժանումներ, որոնք քրդերի հետ միասին համագործակցում են «Իսլամական պետություն» ահաբեկչական կազմակերպության դեմ պայքարում:
Հետևեք մեզ Viber-ում
