«Պետք է հասկանալ՝ երեկոյան 21։20-ին զինծառայողների խումբն ի՞նչ գործ ուներ զորամասից դուրս»․ Բադալյան

Քաղաքագետ Հակոբ Բադալյանը գրում է․ Բանակում այսօր եղել է ողբերգական նոր միջադեպ։ Ֆորմալ իմաստով, տեղի ունեցածը բանակում չէ, այլ զորամասից դուրս, ճանապարհի վրա, ոտեղ զինվորներին վրաերթի է ենթարկել բեռնատարը։ Զինծառայողներից մեկը մահացել է։

Բայց, դա բանակում եղած ողբերգություն է, եւ ոչ լոկ այն պատճառով, որ խոսքը զինվորի մասին է։ Պետք է հասկանալ, թե երեկոյան 21․20–ին զինծառայողների խումբը ի՞նչ գործ ուներ զորամասից դուրս, ճանապարհի վրա։ Նրանք ծառայության մե՞ջ էին, արձակման թերթի՞կ ունեին, թե՞ հեռացել էին զորամասից ինքնակամ։ Բոլոր պարագաներում պարզ է, որ խնդիրը ծառայության կազմակերպման եւ կարգապահության դաշտում է, հետեւաբար՝ զինուժի դաշտում

Ու սա չեմ ասում պարզապես նրա համար, որ հաջորդիվ ինչ որ «հերթապահ» քննադատություն ու ընդդիմախոսություն հնչեցնել բանակի ղեկավարության, քաղաքական ղեկավարության հասցեին։ Դա չունի ըստ էության ոչ մի օգուտ։ Նրանք բացարձակապես չեն ազդվում որեւէ քննադատությունից, չեն խորհում որեւէ քննադատության առիթով, խորամուխ չեն լինոմ որեւէ քննադատության մեջ։ Պատճառը ոչ միայն արժեհամակարգն ու մտածողությունն է, այլ նաեւ «ինքնապահպանման» բնազդը։

Նրանք զբաղված են ինքնապահպանման գործով, ինչը պահանջում է PR, PR, եվ նորից՝ PR։

Ու այստեղ է ամենաողբերգականը, որ հերթական դեպքի շեմին դարձյալ PR գերակտիվություն էր։ Նախարար Սուրեն Պապիկյանը չգիտես ինչու ռազմական հանդերձանքով իբրեւ թե անակընկալ այցեր է կատարում զորամասեր, ստուգում ծառայությունը, զրուցում զինֆորների հետ, հետեւում ինժեներական աշխատանքներին, ու նույնիսկ պաշտոնապես հայտնում են, թե ստեղծվում է ինքնասպանությունների ու ոչ կանոնադրական հարաբերությունների դեմ պայքարի համակարգային մշակում իրականացնող խումբ։

Գործնականում՝ կրկնեմ, միայն քարոզչություն, առավելապես քարոզչություն, ոչ մի առարկայական եւ էական բան։ Ու ահա, հերթական ողբերգական միջադեպը։

Երիտասարդները չեն հիշի դեռեւս խորհրդային իրականությունից եկող հայտնի խոսքը՝ եթե ուզում ես թաղել ինչ որ հարց, ստեղծիր դրանով զբաղվող հանձնաժողով։

Եթե հայտարարում են, թե ինքնասպանությունների ու ոչ կանոնադրական հարաբերությունների դեմ համակարգային պայքար մշակող խումբ են ստեղծում, ուրեմն ըստ էության ոչ մի համակարգային պայքար էլ չի լինելու, լինելու է նույնը, պարզապես նոր փաթեթավորումներով։ Ինչպես, ի դեպ՝ նոր ռազմական ոստիկանության պետը, որ նշանակվել էր նոր ողբերգական դեպքից մեկ օր առաջ։