Հանրապետականը չարիքի ու «պեշկայի» արանքում
Հայաստանի չորրորդ նախագահի պաշտոնում հայաստանյան ներկա իրականության հետ կապ չունեցող Արմեն Սարգսյանի առաջադրմամբ՝ Սերժ Սարգսյանը նոր խլրտոց է առաջացրել կուսակցությունում: Արդեն մի քանի օր է կուսակցությունում կորցրել են հանգիստը, վիրավորված են առաջնորդի քայլից, ով, փաստորեն, տասնյակ հազարավորներից ձեւավորված կուսակցությունում արժանավոր մեկին չգտավ, որը կարող էր պետության խորհրդանիշ դառնալ: Իհարկե, ՀՀ Սահմանադրությունը պահանջում է, որ թեկնածուն այս լինի անկուսակցական, սակայն ցանկացած ՀՀԿ-ական կարող էր կասեցնել կուսակցական անդամությունը, ինչը չի խոչընդոտում Սահմանադրությունը: Վերջին երկու տարվա ընթացքում սա Սերժ Սարգսյանի երկրորդ նման քայլն է, որի արդյունքում խոշոր խաղից դուրս են հայտնվում յուրայինները: Երկու տարի առաջ էլ Մոսկվայից Երևան հրավիրվեց Կարեն Կարապետյանը, որին առաջարկվեց ՀՀ վարչապետի և ՀՀԿ նախագահի առաջին տեղակալի պաշտոնները: Մի՞թե այդքան սնանկ է Հանրապետականի կադրային ռեզերվը , կամ միթե նրանք ընկալելի չեն հանրության համար, որ ամեն անգամ ընտրությունը կանգ է առնում դրսի թեկնածուների վրա: Հարցն այս ՀՀԿ մամուլի խոսնակ Էդուարդ Շարմազանովին վրդովեցնում է այնքան, որքան նրա թիմին Սերժ Սարգսյանի այդ քայլը: «Ի՞նչ է նշանակում դրսից, նա դրսից չէ: Արմեն Սարգսյանը Միացյալ Թագավարությունում ՀՀ դեսպանն է: Արմեն Սարգսյանի առնչությամբ «դուրս» ասելը ճիշտ չէ: Նա Հայաստանի Հանրապետության դիվանագետ է, նշանակվել է դեսպան ՀՀ նախագահի հրամանագրով: Արմեն Սարգսյանն այն եզակի գործիչներից է, որ նույն պաշտոնին նշանակվել է ՀՀ երեք նախագահների կողմից:Եւ խոսել այն մասին, որ նա դրսից բերված մարդ է, արդացի չէ: Ինչ վերաբերում է «ոչ կուսակցության ներսից» արտահայտությանը: Կներեք, դուք Սահմանադրություն չեք կարդացել: Այնտեղ հստակ գրված է, որ ՀՀ 4-րդ նախագահը պետք է լինի անկուսակցական: Ոնց կարող ենք հանրապետական կամ մեկ այլ կուսակցության անդամի առաջադրել: Սահմանադրության մեջ կան չափորոշիչներ, որոնց պետք է համապատասխանի նախագահը»,- ասում է Էդուարդ Շարմազանովը: Նրա համար ընդունելի չեն այն դիտարկումները, թե վերջին շրջանում իշխանություններն այս կամ այն պաշտոնին թեկնածուներ են ներկայացնում համակարգից դուրս: «Ինչ է նշանակում համակարգի ծնունդ է կամ ոչ: Կարեն Կարապետյանը եղել է Էներգետիկայի նախարարի տեղակալ,եղել է Երևանի քաղաքապետ, ՀՀԿ կուսակցության ավագանու ներկայացուցիչ: Բա որ Կարեն Կարապետյանը մեր թիմի անդամ չէ, բա ո՞վ է մեր թիմի անդամ: Կամ ինչ է նշանակում համակարգից դուրս: Չեմ հասկանում այդ դիտարկումները: Միացյալ Թագավորությունում Հայաստանի դեսպանը, ՀՀ նախկին վարչապետը եւ պետական համակարգի ներկայացուցիչ չէ, բա լավ՝ ո՞վ է պետական համակարգի ներկայացուցիչը»,- հարցնում է նա: Շարմազանովն այնքան է բարկանում ու փորձում հերքել անհերքելին, որ ՀՀ չորրորդ նախագահին ներկայացնում է <<պեշկայի>> դերում.<<Ի վերջո, եկեք ոչ գնահատենք, ոչ էլ գերագնահատենք նախագահի լիազորությունները, որովհետեւ դրանք բոլորովին այլ են մինչեւ ապրիլ, եւ այլ են լինելու ապրիլից հետո, դա ավելի շատ ներկայացուցչական է լինելու, ճիշտ է պետության գլուխ է, ուղերձներով հանդես գալու իրավունք ունի, բայց դա ավելի շատ ներկայացուցչական է>>: Թեպետ որքան էլ թերագնահատեն նոր մոդելում նախագահի դերն ու նշանակությունը, այդուհանդերձ Սահմանադրությունը հակառակի մասին է փաստում, միայն այն հանգամանքը, որ նախագահն է հաստատում կամ մերժում, վետո դնում ԱԺ-ի կողմից ընդունված օրենքներին, արդեն ծանրակշիռ լիազորությունն է տալիս այդ պաշտոնին: Դրանից բացի դեռեւս հարց է՝ բիզնես մտածողությամբ կոփված Արմեն Սարգսյանը միթե կարող է բավարարվել միայն իր սիմվոլիկ ներկայացվածությամբ եւ այն փաստով, որ իր կենսագրության մեջ ոսկե տառերով կգրվի ՀՀ նախագահ լինելու տողը, թե այդուհանդերձ տուրք տալով բիզնես ախորժակին, կներքաշվի ներիշխանական ինտրիգների մեջ: Հանուն արդարության պետք է ասել, որ էականորեն տարբերվում են Արմեն Սարգսյանի եւ Կարեն Կարապետյանի առաքելությունները: Եթե Սսարգսյանին բերում են որպես դրսում ընկալելի անձնավորության պետության խորհրդանիշ ներկայացնելու համար, ապա Կարեն Կարապետյանի գործած չարիքը ոչ ոչ մեկ չի կարող կրկնել: Երկու տարի առաջ Հայաստան գալու նրա գլխավոր առաքելությունը թերեւս այն էր, որ ապահովեր ՀՀԿ-ի իշխանության վերարտադրությունը՝ նոր դեմքով ու հանրությանը ոչ այնքան ծանոթ իր կերպարով: Սակայն հետո պարզվեց, որ նա ոչ միայն չի զիջում որեւէ ՀՀԿ-ականի, այլ կարող է նրանցից վատը լինել: Անի Սահակյան
Հետևեք մեզ Viber-ում
