«Երկիր Ծիրանի»-ն Լևոն Ալթունյանից պահանջում է հրամանը չգործող ճանաչել

Ըստ հիվանդների պնդումների, չարորակ նորագոյացությունների վիրաբուժական բուժման համար նրանց հնարավորություն չի ընձեռնվում պետական պատվերի շրջանակներում վիրահատական բուժում ստանալ իրենց կողմից ընտրված բուժական հաստատությունում, իրենց ընտրած բժշկի կողմից, այն պարագայում, երբ ունեն հաշմանդամության կարգ։ Այս մասին հայտարարություն է տարածել Երևանի ավագանու «Երկիր Ծիրանի» խմբակցության անդամ բժիշկ-նյարդավիրաբույժ Մարինա Խաչատրյանը: Նա այս խնդրի կապակցությամբ դիմել է Հայաստանի Հանրապետության Առողջապահության նախարար Լևոն Ալթունյանին, խնդրելով չգործող ճանաչել 2015 թվականի ՀՀ առողջապահության նախարարի N 49-Ն հրամանը, որի համաձայն ոչ բոլոր բուժհաստատություններն ունեն իրավունք (լիցենզիա) պետական պատվերի շրջանակներում բժշկական օգնություն տրամադրելու չարորակ նորագոյացությունների բուժման հարցում: Սույն հրամանը խախտում է քաղաքացիների իրավունքները, հակասում օրենքներին, որոնք ավելի գերակա են, որում սահմանվում է պետության կողմից երաշխավորված անվճար բժշկական օգնություն և սպասարկում ստանալու իրավունք ունեցող բնակչության սոցիալապես անապահով ու առանձին (հատուկ) խմբերի ցանկը, որտեղ ներառված են նաև հաշմանդամության կարգ ունեցող անձինք: