Այլընտրա՞նք, թե՞ պարտադրանք. «պատերազմ է ընթանում»

Այսօր ԱԺ-ում «Գենետիկորեն ձևափոխված օրգանիզմներ՝ այլընտրա՞նք, թե՞ պարտադրանք» թեմայով լսումների ժամանակ կազմակերպիչ ԱԺ Տարածքային կառավարման, տեղական ինքնակառավարման, գյուղատնտեսության և բնապահպանության հարցերի մշտական հանձնաժողովի նախագահ Վարդևան Գրիգորյանը նշեց, որ նախորդ գումարման ԱԺ-ն քննարկել էր Գենետիկորեն ձևափոխված օրգանիզմների գործունեության կենսաանվտանգության մասին ՀՀ օրենքի նախագիծ, որն առաջին ընթերցմամբ ընդունվել էր, բայց հետո կառավարությունը հետ է վերցրել։Ինչպես ասաց՝  պատերազմ է ընթանում էկոլոգիապես մաքուր սննդի և ԳՄՕ պարունակող սննդի կողմնակիցների միջև։ Գյուղատնտեսության նախարարի տեղակալ Աշոտ Հարությունյանն իր զեկույցում նշեց, որ Monsanto ընկերությունը տարիներ շարունակ ներկայացված է հայկական շուկայում միջնորդների միջոցով, այստեղ դրա ներկայացուցիչը «Ագրոլայն» ընկերությունն է, և անցած տարի ՀՀ են ներմուծվել ԳՁՕ պարունակող բանջարաբոստանային մշակաբույսերի 125 կգ սերմեր։ Փոխնախարարի խոսքով՝ ՀՀ-ում սերմերի շուկան ազատականացված է, ՀՀ-ում չկա որևէ օրենսդրական ակտ, որն արգելի գենետիկորեն ձևափոխված սերմերի օգտագործումը: Նա նշեց, որ ՀՀ-ն 2004-ին միացել է Կարթագենյան արձանագրությանը, որի հիմնարար սկզբունքն է՝ նախազգուշական սկզբունքը, այսինքն՝ երկիրն իրավունք ունի հրաժարվել ԳՁՕ ներմուծումից՝ զգուշանալով շրջակա միջավայրի և մարդկանց համար վտանգավոր հետևանքներից։