Օգոստոսի 12-ի արևային խավարումը կնվազեցնի Եվրոպայում էլեկտրաէներգիայի արտադրությունը

Օգոստոսի 12-ի արևային խավարումը կհանգեցնի Եվրոպայի արևային էլեկտրակայաններում էլեկտրաէներգիայի արտադրության ժամանակավոր նվազման, սակայն Ֆրանսիայում էլեկտրամատակարարման խափանումներ չեն սպասվում, հայտնում է Le Figaro-ն՝ հղում անելով ֆրանսիական բարձրավոլտ ցանցի՝ RTE օպերատորի տվյալներին։

Ընկերության տեղեկությամբ՝ արևի մասնակի խավարման ընթացքում, որը օգոստոսի 12-ի երեկոյան կանցնի Եվրոպայի վրայով, արևային լուսավորության նվազումը կհանգեցնի ֆոտոգեներացիայի ծավալների արագ կրճատման, ապա՝ վերականգնման։ Ֆրանսիայի առանձին շրջաններում Արեգակը կփակվի մինչև 99%-ով, իսկ Իսպանիայի հյուսիսում խավարումը կլինի լիակատար։

Ակնկալվում է, որ խավարման առավելագույն փուլի ժամանակահատվածում՝ մոտավորապես 19:30-ից 21:30-ը, Եվրոպայում արևային էներգիայի արտադրությունը կնվազի գրեթե 9,7 հազար ՄՎտ-ով, ինչը համապատասխանում է Եվրամիության տեղադրված արևային հզորության մոտ 3,7%-ին։

Ֆրանսիայում արևային գեներացիայի հզորության նվազումը պարզ եղանակի պայմաններում կարող է կազմել մոտ 1,8 հազար ՄՎտ՝ ազգային էլեկտրաէներգիայի արտադրության մոտ 3%-ը։

Միևնույն ժամանակ RTE-ն հայտարարել է, որ սպառողների վրա որևէ ազդեցություն չի ակնկալում։ Օպերատորի տվյալներով՝ հզորությունների պաշարները բավարար են, իսկ խավարումը տեղի կունենա երեկոյան, երբ արևային գեներացիայի պիկն արդեն անցած կլինի։

Արտադրության նվազումից ամենաշատը կտուժեն Գերմանիան և Իսպանիան․ ակնկալվող անկումը կկազմի համապատասխանաբար մոտ 3,3 հազար ՄՎտ և 3 հազար ՄՎտ։

RTE-ն նշել է, որ արևային էլեկտրակայանների թվի աճը օպերատորներից պահանջում է էներգահամակարգի կառավարման ընթացքում հաշվի առնել նոր գործոններ։ 2015 թվականի մարտին նախորդ խոշոր մասնակի խավարման ժամանակ Ֆրանսիայում արևային էներգիայի արտադրությունը կրճատվել էր մոտ 2 հազար ՄՎտ-ով, իսկ Եվրոպայում՝ 35 ԳՎտ-ով, սակայն օպերատորների համակարգման շնորհիվ լուրջ խնդիրներից հաջողվել էր խուսափել։

Ներկայում Ֆրանսիայում արևային էներգետիկայի տեղադրված հզորությունը գերազանցում է 30 ԳՎտ-ը։