Marca-ն նշել է ՖԻՖԱ-ի նախագահի պաշտոնում Ինֆանտինոյին փոխարինելու գլխավոր թեկնածուներին

Իսպանական հեղինակավոր Marca պարբերականը հրապարակել է այն հինգ հիմնական թեկնածուների անունները, որոնք կարող են փոխարինել Ջանի Ինֆանտինոյին Ֆուտբոլի միջազգային ֆեդերացիայի (ՖԻՖԱ) նախագահի պաշտոնում։ Այս մասին տեղեկանում ենք armsport.am կայքից։

Հավակնորդների ցանկում ընդգրկված են։ 

Նասեր Ալ-Խելաիֆի – ՊՍԺ-ի նախագահ, Եվրոպական ֆուտբոլային ակումբների ասոցիացիայի (ECA) նախագահ,

Վիկտոր Մոնտալյանի – ՖԻՖԱ-ի փոխնախագահ, Հյուսիսային և Կենտրոնական Ամերիկայի ու Կարիբյան ավազանի երկրների ֆուտբոլի կոնֆեդերացիայի (ԿՈՆԿԱԿԱՖ) նախագահ,

Ալեքսանդր Չեֆերին – ՈւԵՖԱ-ի նախագահ,

Շեյխ Սալման բին Իբրահիմ Ալ Խալիֆա – Ասիայի ֆուտբոլի կոնֆեդերացիայի (AFC) նախագահ,

Պատրիս Մոցեպե – Աֆրիկայի ֆուտբոլի կոնֆեդերացիայի (CAF) նախագահ:

Նշվում է, որ Մոնտալյանիի թեկնածությունը դիտարկվում է որպես ամենատրամաբանական տարբերակ, քանի որ նա զբաղեցնում է ՖԻՖԱ-ի խորհրդի փոխնախագահի պաշտոնը և քաջածանոթ է կառույցի ներքին աշխատանքին։

Թեկնածուների հայտերի ընդունման վերջնաժամկետը սահմանված է 2026 թվականի նոյեմբերի 18-ը։ Հավակնորդ առաջադրելու իրավունք ունեն բացառապես ազգային ֆուտբոլային ասոցիացիաները, ընդ որում, թեկնածուն պետք է ստանա առնվազն հինգ ֆեդերացիայի աջակցություն։

Հավելենք, որ ՖԻՖԱ-ի նախագահի ընտրությունները կկայանան 2027 թվականի մարտի 18-ին՝ Մարոկկոյի մայրաքաղաք Ռաբաթում։