Գագիկ Ծառուկյանն Արարատ անունով ինչ ունի, վերցնում են. վստահ եմ անգամ՝ ունեցվածքը չէ հարցը, հարցն այդ ցուցանակներն են. Ագնեսա Խամոյան

Սիրելի հայրենակիցներ, ինչպես ասում են, երեք բանի անվերջ կարելի է նայել՝ հոսող ջրին, վառվող կրակին, մեկ էլ, թե ինչպես է ՔՊ-ն, օրեր շարունակ փորձում ապացուցել, որ ժողովրդավար է, որ ընտրություններ չի կեղծել։ Այս մասին Ազգային ժողովի 9-րդ գումարման առաջին նստաշրջանին ասել է «Հայաստան» խմբակցության պատգամավոր Ագնեսա Խամոյանը:

«Ժողովուրդ ջան, սո՛ւս մնացեք, դուք օրը ցերեկով 60,000 քաղաքացու ձայն գողացել եք: Այո՛, դուք մեկ քլիքով գողացել եք 60,000 քաղաքացու ձայն, դուք մանդատագողեր եք, փորձեք առերեսվել այդ իրականության հետ։

Դուք ժողովրդավարության հետ կապ չունեք այլևս։ Դուք ժողովրդավարության հետ կապ ունեք այնքան, որքան ընդդիմության վրա հարձակվող կարմիր բերետավորները՝ դիվանագիտական արվեստի։

Բայց մանդատները գողանալով միայն չեք բավարարվել, դուք այդ մարդուն հիմա ունեզրկում եք: Ես երբեք չեմ կիսել Գագիկ Ծառուկյանի քաղաքական ճաշակը, բայց դուք այդ մարդու ձայները գողացել եք, մանդատները գողացել եք, հիմա էլ ոտնձգություն եք իրականացնում իր ունեցվածքի նկատմամբ:

Գործընկերներ ջան, նկատե՞լ եք, այդ մարդն Արարատ անունով ինչ ունի, հիմա վերցնում են: Ես վստահ եմ անգամ, որ ունեցվածքը չէ հարցը, այդ ցուցանակներն են հարցը: «Արարատ» կոնյակի-գինու-օղու կոմբինատի ցուցանակը հանելն է երևի հարցը, «Արարատցեմետ» գործարանի ցուցանակը հանելն է խնդիրը: Ես վստահ եմ, որ խնդիրը դա է»,-նշել է Ագնեսա Խամոյանը: