Պակիստանում ձնահյուսից հետո հայտնաբերվել է չորս լեռնագնացի մարմին. վեց մարդու որոնումները շարունակվում են

Պակիստանի Բրոդ Պիկ լեռան վրա ձնահյուսի հետևանքով անհետ կորած միջազգային արշավախմբի անդամներից չորսի մարմինը հայտնաբերվել է, առնվազն վեց լեռնագնացի որոնումները շարունակվում են։ Ինչպես տեղեկացնում է Associated Press-ը, օգոստոսի 1-ին որոնողափրկարարական աշխատանքները վերսկսվել են Պակիստանի բանակի ուղղաթիռների և փորձառու լեռնագնացների ներգրավմամբ։ Որոնումները նախորդ օրը դժվարացել էին եղանակային անբարենպաստ պայմանների պատճառով։

Զոհերից երեքը նույնականացվել են։ Նրանք են Օմանի քաղաքացի Նադիրա Ահմեդը, ԱՄՆ քաղաքացի Մալորի Գեյսը և Նեպալի քաղաքացի Բահադուր Գուրունգը։ Չորրորդ զոհի ինքնության մասին պաշտոնական տեղեկություն դեռ չի հրապարակվել։

Տասը անդամից բաղկացած միջազգային արշավախումբը հուլիսի 30-ին կորցրել է կապը բազային ճամբարի հետ՝ լեռան գագաթ բարձրանալու փորձի ժամանակ ձնահյուսի տակ մնալուց հետո։

Արշավախմբի կազմում եղել են հինգ նեպալցի, ինչպես նաև ԱՄՆ-ի, Օմանի, Պակիստանի և Չինաստանի քաղաքացիներ։ Խումբը ղեկավարել է նեպալցի հայտնի լեռնագնաց Նիրմալ Պուրջան, որը շարունակում է անհետ կորած համարվել։

Պակիստանի Ալպյան ակումբից հայտնել են, որ որոնողափրկարարական աշխատանքները շարունակվում են՝ չնայած ողջ մնացածներին հայտնաբերելու հույսերի նվազմանը։

8051 մետր բարձրությամբ Բրոդ Պիկն աշխարհի 12-րդ ամենաբարձր գագաթն է։ Այն գտնվում է Պակիստանի հյուսիսային Գիլգիթ-Բալտիստան շրջանում՝ Կարակորում լեռնաշղթայում։