Իսպանիան զինվորականներ և ոստիկանություն է ուղարկում Սեուտա՝ Մարոկկոյից ներգաղթյալների զանգվածային անցումից հետո

Իսպանիան լրացուցիչ ոստիկանության և բանակի ուժեր է ուղարկում իր հյուսիսաֆրիկյան անկլավ Սեուտա՝ հարևան Մարոկկոյից ներգաղթյալների զանգվածային անցումից հետո, գրում է The Guardian-ը։

Իսպանական լրատվամիջոցների տվյալներով՝ մի քանի ժամվա ընթացքում անկլավ կարող էր մուտք գործել 2-3 հազար մարդ։ Նրանցից շատերը սահմանը հատել են լողալով կամ ոտքով՝ Տարախալ լողափի ալեհատ պատնեշի միջոցով։ Հաղորդվել է նաև սահմանային ցանկապատը ճեղքելու դեպքերի մասին։

Դեպքի վայրից կադրերը ցույց են տվել մարդկանց մեծ խմբեր, որոնք դուրս էին գալիս ափ, տեղաշարժվում փողոցներով և շարժվում դեպի տարածքի խորքը։ Ժամանածների շրջանում հիմնականում երիտասարդ տղամարդիկ էին, սակայն ներգաղթյալների թվում նաև կանայք և երեխաներ կային։

Իսպանիայի Քաղաքացիական գվարդիայի ներկայացուցիչը հայտարարել է, որ մարդիկ «զանգվածաբար ժամանում էին ծովից», սակայն անցմանը մասնակցածների ճշգրիտ թիվը չի հստակեցրել։

Սեուտայի Քաղաքացիական գվարդիայի աշխատակիցների ասոցիացիայի ղեկավար Ռաշիդ Սբիհին իրավիճակը անվանել է «լիակատար քաոս» և հայտարարել, որ սահմանը «ամբողջությամբ փլուզվել է»։

Սեուտայի նախագահ Խուան Խեսուս Վիվասը պահանջել է լրացուցիչ ոստիկանության և բանակի ուժեր ուղարկել՝ սահմանը և բնակիչների անվտանգությունը պաշտպանելու համար։ Նա միաժամանակ կենտրոնական կառավարությանը կոչ է արել միգրացիոն ճգնաժամի մասշտաբների պատճառով արտակարգ դրություն հայտարարել ։

Սակայն Իսպանիայի Ներքին գործերի նախարարությունը մերժել է այդ նախաձեռնությունը՝ հայտարարելով, որ արտակարգ դրություն չի կարող սահմանվել բացառապես միգրացիոն խնդիրների պատճառով։ Փոխարենը իշխանությունները հայտարարել են Սեուտա 60 զինծառայողի և Քաղաքացիական գվարդիայի 30 լրացուցիչ աշխատակցի ուղարկելու մասին։

Իրավիճակը հիշեցնում է 2021 թվականի մայիսի միգրացիոն ճգնաժամը, երբ ավելի քան 8 հազար մարդ երկու օրվա ընթացքում հատեց Սեուտայի սահմանը։

Իսպանիայի վարչապետ Պեդրո Սանչեսը ուրբաթ պետք է այցելի Սեուտա՝ Ներքին գործերի նախարար Ֆերնանդո Գրանդե-Մառլասկայի հետ միասին։ Նա հայտարարել է, որ կառավարությունը ստեղծված իրավիճակին «անհապաղ պատասխան» կտա։