Տ. Մանսուրյանը ՝«Գրեմմի» գնալու մասին
Աշխարհահռչակ հայ կոմպոզիտոր Տիգրան Մանսուրյանի «Ռեքվիեմ»-ը ներկայացված է հունվարի 28-ին Նյու Յորքում կայանալիք «Գրեմմիի» 60 -րդ հոբելյանական մրցանակաբաշխությանը՝ «լավագույն երգչախմբային ներկայացում» եւ «լավագույն դասական ստեղծագործություն» անվանակարգերում: Տիգրան Մանսուրյանի օգնականը «Հայկական Ժամանակ»-ի հետ զրույցում ասաց, որ մաեստրոն մրցանակաբաշխությանը չի գնալու եւ չցանկացավ այլ մեկնաբանություն տալ սրա հետ կապված: Նա նշեց, որ այս օրերին Մանսուրյանը լարված աշխատում է երեք ստեղծագործության վրա, որոնք պետք է արագ ավարտին հասցնի: Տիգրան Մանուրյանի «Գրեմմի» մրցանակաբաշխությանը ներկայացված Հայոց ցեղասպանության զոհերին նվիրված «Ռեքվիեմ» ստեղծագործությունը հունվարի 18-ին Դասական երաժշտության միջազգային մրցույթում «ժամանակակից երաժշտություն»անվանակարգում արժանացել է գլխավոր մրցանակին: Մրցույթը տեղի է ունեցել Լյուքսեմբուրգում, սակայն Մանսուրյանը այստեղ էլ ներկա չի գտնվել: Մաեստրոյի օգնականը նշեց, որ նա չի ցանկանում այս օրերին հարցազրույցներ տալ և այս պահին մրցանակներով առանձնապես տարված չէ: «Գրեմմի»-ին է առաջադրված նաև Տիգրան Մանսուրյանի պրոդյուսեր Մանֆրեդ Այխերը՝ որպես «Տարվա պրոդյուսեր դասական ոճում»:
Հետևեք մեզ Viber-ում
