Դավիթ Բաբայանը`սահմանի վիճակի մասին

Սահմանին իրավիճակը կայուն և վերահսկելի է, իսկ քաղաքական տեսանկյունից Ադրբեջանի կատարած գործողությունները տրամաբանություն չունեն: Այս մասին Tert.am-ի հետ զրույցում ասաց Արցախի Հանրապետության նախագահի խոսնակ Դավիթ Բաբայանը՝ անդրադառնալով հունվարի 25-ի գիշերը շփման գծում հակառակորդի ձեռնարկած դիվերսիոն խմբի ներթափանցման փորձին: «Բազմիցս եմ նշել, որ քաղաքական տեսանկյունից մենք գործ ունենք ահաբեկչական երկրի հետ: 2018 թվականին կան բազմաթիվ իրադարձություններ՝ արհեստածին Ադրբեջանի 100-րդ ամյակն է, Հեյդար Ալիևի 85-ամյակն է, Աղդամի, Ֆիզուլիի, Ջեբրաիլի, Զանգելանի, Քելբաջարի 25-ամյակն է՝ Ադրբեջանի կողմից սանձազերծած պատերազմի հետևանքով ամենամեծ տարածքային կորուստների 25-ամյակն է: Հետևաբար` Ադրբեջանը նման աննորմալ պահվածքով փորձում է սեփական ժողովրդի առաջ ռեյտինգ հավաքել և իր քայլերը ներկայացնել որպես հայրենասիրության դրսևորում»,-ասաց Բաբայանը: Դիտարկմանը, թե որը կարող է լինել դիվերսիոն ներթափանցման փորձ իրականացնելու տրամաբանությունը՝ հաշվի առնելով, որ ԵԱՀԿ գործող նախագահի անձնական ներկայացուցիչ, դեսպան Անջեյ Կասպրշիկը տարածաշրջանում է, մշտադիտարկում է անցկացվելու և այլն, Դավիթ Բաբայանն ասաց. «Նման ահաբեկչական քայլերը տրամաբանություն չունեն: Նախատեսվում է համանախագահների այցը տարածաշրջան, մշտադիտարկում է կատարվելու, Կասպրշիկն է տարածաշրջանում և երեկ հանդիպել է նախագահ Բակո Սահակյանի հետ, ԵԽԽՎ-ում տարբեր գործընթացներ են ընթանում, նախագահ Սերժ Սարգսյանն է ելույթ ունեցել, իսկ Ադրբեջանը նման քայլերի է դիմում, տրամաբանություն դրանց գործերի մեջ չկա»: Դավիթ Բաբայանը հավելեց, որ նման ցանկացած փորձ կասեցվելու է, և Արցախը, չնայած դեմ է մարդկային կորուստներին, բայց նման քայլերի դեպքում պահելու է իր արժանապատվությունը և պաշտպանելու է իր անկախությունը: