ՀԱՄԱՍ-ի պատվիրակությունը մեկնել է Կահիրե՝ հրադադարի իրականացման շուրջ բանակցությունները վերսկսելու

Պաղեստինյան ՀԱՄԱՍ խմբավորումը հայտնել է, որ իր բանակցային պատվիրակությունն հուլիսի 28-ին մեկնել է Կահիրե՝ Իսրայելի հետ հրադադարի երկրորդ փուլի իրականացման վերաբերյալ բանակցությունները վերսկսելու համար։ «Արմենպրես»-ի փոխանցմամբ՝ այս մասին հաղորդում է Al Jazeera-ն։

 Հայտարարության մեջ նշվել է, որ պատվիրակությունը հանդիպումներ կունենա Եգիպտոսի, Կատարի և Թուրքիայի միջնորդների, ինչպես նաև պաղեստինյան խմբակցությունների հետ՝ «հրադադարն ամրապնդելու և բոլոր պայմանավորվածությունների կատարումն ապահովելու համար»։

 Տեղեկություններ են հաղորդվում, որ ՀԱՄԱՍ-ի ներկայացուցիչները «դրական են վերաբերվում Խաղաղության խորհրդի և միջնորդների կողմից ներկայացված «ճանապարհային քարտեզի» պահանջներին՝ Իսրայելի համաձայնության պայմանով»:

Հունվարի 22-ին Դավոսում կայացած Համաշխարհային տնտեսական ֆորումի շրջանակներում 19 երկրների ներկայացուցիչներ, այդ թվում՝ ՀՀ վարչապետ Նիկոլ Փաշինյանը, ստորագրել են Գազայի խաղաղության գործընթացի շրջանակներում ստեղծված Խաղաղության խորհրդի կանոնադրությունը:

Վաշինգտոնը հայտարարել էր, որ կազմակերպությանը միացել են նաև այլ պետություններ: Խաղաղության խորհուրդը ստեղծվել է Իսրայելի և ՀԱՄԱՍ-ի միջև Գազայի կառավարման վերաբերյալ համաձայնագրի հիման վրա, սակայն ենթադրվում է, որ այն նաև կզբաղվի այլ տարածաշրջաններում հակամարտությունների կանխարգելման և լուծման հարցերով:

Գազայում խաղաղության գործընթացի առաջին փուլից երկրորդ փուլ անցումը, ներառյալ անկլավում իշխանության փոխանցումը հատուկ ստեղծված տեխնոկրատական ​​կոմիտեին, ներկայում բարդանում է ՀԱՄԱՍ-ի ուժերի զինաթափման խնդրի պատճառով:

Իսրայելական ուժերը շարունակում են խախտել հրադադարի համաձայնագիրը Գազայի հատվածում՝ տեղահանված անձանց բնակավայրերի օդային և հրետանային ռմբակոծությունների միջոցով, բացի «դեղին գծի» տարածքում քանդման և ոչնչացման գործողություններից՝ միաժամանակ պահպանելով ապրանքների, օգնության և տեղաշարժի սահմանափակումները։

Պաղեստինի առողջապահության նախարարությունը հայտնել է, որ 2023 թ. հոկտեմբերից ի վեր Գազայի հատվածում Իսրայելի ռազմական գործողությունների հետևանքով զոհված պաղեստինցիների թիվը հասել է 73 333-ի, իսկ վիրավորների թիվը՝ 174 023-ի։