«Ի՞նչ է իրենից ներկայացնում բիթքոինը. Բիթքոինը մտնում է Հայաստան»

Հայաստան է ժամանել բիթքոինի միջազգային փորձագետ, Blockchain Technologies Corporation-ի տնօրեն Նիք Սպանոսը: Լրագրողների հետ այսօրվա զրույցում նա նշեց Հայաստան այցի նպատակը և ներկայացրեց, թե ինչ է իրենից ներկայացնում բիթքոի­նը: Նա հայտնեց, որ արդեն հանդիպել են հայկական ինժեներներին և հետազոտողներին ու պատրաստ են աջակցել նրանց: «Բիթքոինը հնարավորություն է տալիս մարդկանց ստանալ իրենց վաստակած գումարները առանց միջնորդի, որովհետև այն չի ճանաչում սահմաններ և օգնում է հավասար պայմաններում աշխատել ու համագործակցել»,- ասաց միջազգային փորձագետը՝ հավելելով, որ այն միայն մեծ բիզնեսի համար չէ, այն նաև փոքր բիզնեսի համար է: Անդրադառնալով բիթքոինի փողերի լվացման ռիսկերին՝ փորձագետը նշեց, որ աշխարհում կանխիկ գումարն է համարվում փողերի լվացման հիմնական միջոցը և այդ առումով բիթքոինը չի կարող մրցել կանխիկ գումարի հետ: Նիք Սպանոսը ասաց, որ այսօր բիթքոինի հանդեպ հետաքրքրությունը մեծ է ամենուր և Հայաստանը մեծ պոտենցիալ ունի այդ ոլորտի զարգացման համար: «Մենք այստեղ ենք, որ հասկանանք ինչով կարելի է օգնել Հայաստանին, որպեսզի այստեղ կատարվող գործարքները դառնան ավելի թափանցիկ: Այսօր մեր խումբը հանդիպել է ՀՀ Կենտրոնական բանկի ներկայացուցիչների հետ, որոնք պատրաս­տակամություն հայտնեցին լսել մեր ծրագրերը և հասկանալ այս նոր տեխնո­լոգիաները»,-եզրափակեց փորձագետը: Քրիստինե Աղաբեկյան