Tagesspiegel-ը ԵԽԽՎ-ում Ադրբեջանին սպասարկող պաշտոնյաների մասին

17:48 - 24/հունվարի/2018

Tagesspiegel-ի թղթակիցը, անդրադառնալով ԵԽԽՎ-ում կոռուպցիայի հետ կապված լուրերին, գրում է, որ Ադրբեջանի հասցեին մեղադրանքները՝ կապված այն բանի հետ, որ նրա ներկայացուցիչները ԵԽԽՎ-ում զբաղվում են «խավիարային դիվանագիտոությամբ», հայտնվել էին դեռևս 2012 թվականին։ Սակայն խնդրի մասշտաբներն ակնհայտ դարձան պատգամավորների մեծամասնությանը միայն այն բանից հետո, երբ անցած տարի Իտալիայի նախկին ներկայացուցիչը հայտնվեց ամբաստանյալի աթոռին՝ կապված փողերի լվացման մեղադրանքների հետ։ « Լուկա Վոլոնտեն Ադրբեջանի ներկայացուցիչներից ստացել էր 2.39 մլն դոլար, և իտալացի քննիչները դա կապել էին ԵԽԽՎ-ում նրա գործունեության հետ, որտեղ նա զարմանալիորեն ակտիվ հանդես էր եկել ի պաշտպանություն Ադրբեջանի և նրա հեղինակավոր ղեկավարության շահերի: Եվրոպայի խորհրդում ձևավորվել էր Ադրբեջանի աջակցության մի ամբողջական խումբ, որի առանձին ներկայացուցիչները նույնիսկ զբաղեցրել են կազմակերպությունում առանցքային պաշտոններ։ Նրանցից մեկը եղել է ԵԽԽՎ նախկին նախագահ Պեդրո Ագրամունտը»: Ադրբեջանի իշխանություններին, մասնավորապես, խորհուրդ է տրվում խավիարային դիվանագիտության հետ կապված կոռուպցիոն սկանդալի անկախ եւ անկողմնակալ հետաքննություն սկսել: Հիշեցնենք, որ երկար տարիներ Ադրբեջանն իր համար ազդեցություն է ապահովել Եվրոպային խորհրդում ձկնկիթի, խոշոր գումարների և շքեղ գորգերի շնորհիվ։ Կոռուպցիոն սկանդալում ներգրավված է եղել ոչ միայն ԵԽԽՎ արդեն նախկին նախագահ Պեդրո Ագրամունտը, ով ճնշման ներքո հրաժարական տվեց անցած հոկտեմբերին, այլև մի շարք եվրոպական երկրների պատգամավորներ՝ Իտալիայի, Գերմանիայի և այլն: