Ալիկ Ալեքսանյանը 2 ամիս չի տեսել որդուն. պաշտպանական կողմը փորձում է հասնել նրա ազատմանը
«Ուժեղ Հայաստան» դաշինքի առաջնորդ Սամվել Կարապետյանի ամենամտերիմ համախոհներից մեկի` ընդդիմադիր գործիչ Ալիկ Ալեքսանյանի հետ տեսակցություններն արգելված չեն, սակայն նա շուրջ երկու ամիս չի տեսել որդուն։ Այս մասին լրագրողներին ասել է նրա փաստաբան Լիանա Գասպարյանը։
Ավելի վաղ «Ուժեղ Հայաստան» խմբակցության ընտրված պատգամավոր Նարեկ Կարապետյանը, որին նույնպես ներգրավել են Ալեքսանյանի գործով, նշել է, որ քաղաքական գործիչների կալանավորման հետ կապված պատմություններում ամենախոցելին երեխաներն են։ Նա պատմել է, որ աշնանը, փաստաբան Ռուբեն Մխիթարյանի ձերբակալման ժամանակ, նրա որդին չգիտեր, թե որտեղ է հայրը և շատ էր կարոտում նրան։ Այդ ժամանակ Ալեքսանյանն այցելեց փոքրիկ տղային և նրան հոր անունից խաղալիք փոխանցեց։
«Այսօր Ալիկի տղան` Բենը, չգիտի, թե ուր է հայրիկը։ Նրան ասել են որ հայրիկը Գյումիրում է, հարցնում է` երբ է գալու: Ամեն կալանքի հետևում կան սպասող երեխաներ, կանայք, անձնական շատ պատմություններ: Մեր այն հայրենակիցներին, ովքեր անսալով իշխանական քարոզչությանը, երբեմն չեն գիտակցում` ինչ է կատարվում Հայաստանում` բացե՛ք ձեր աչքերը.. բացե՛ք ձեր աչքերը...», – գրել է քաղաքական գործիչը։
Հետևեք մեզ Viber-ում
