«Արբատի» հիմնադրի սպանությունը. Վարաժ Մանուկյանը կարող է դատապարտվել 24 տարվա ազատազրկման

Պետական ​​մեղադրողը Ռուսաստանի ռազմական դատարանին խնդրում է 24 տարվա ազատազրկման դատապարտել Վարաժ Մանուկյանին, որը մեղադրվում է Մոսկվայում «Արբատ» գումարտակի ղեկավար Արմեն Սարգսյանի մահվան պատճառ դարձած ահաբեկչական հարձակմանը մասնակցելու մեջ։ Այս մասին գրում է Սպուտնիկ Արմենիան։

Մեղադրողը պահանջել է, որ նա 24 տարվա ազատազրկումից 6 տարին անցկացնի կալանավայրում, իսկ մնացած մասը` խիստ ռեժիմի գաղութում։ Մեղադրողը նաև պահանջում է բռնագրավել պայթուցիկը տեղափոխելու համար օգտագործված տրանսպորտային միջոցը հօգուտ պետության։

Մեղադրյալը հրաժարվել է իր վերաբերմունքն արտահայտել առաջադրված մեղադրանքների վերաբերյալ՝ հղում անելով ՌԴ Սահմանադրության 51-րդ հոդվածին։ Մանուկյանի եզրափակիչ խոսքը լսելու և մեղադրյալի դատավճիռը հրապարակելու դատական նիստը նախատեսվում է անցկացնել հաջորդ շաբաթ։

Պետական ​​մեղադրողը նաև խնդրում է դատարանին լիովին բավարարել տուժածների քաղաքացիական հայցերը, որոնք, իրենց հերթին, համաձայնել են դատախազի հետ։

Հիշեցնենք` փետրվարի 3–ին Մոսկվայի հյուսիս-արևմուտքում գտնվող «Ալ առագաստներ» բնակելի համալիրի 29-հարկանի շենքում պայթյուն էր տեղի ունեցել։ Պայթյունից անմիջապես հետո հայտնի դարձավ, որ 1 մարդ մահացել է, 4-ը` տարբեր աստիճանի վնասվածքներ ստացել, նրանց թվում է ԴԺՀ-ում կամավորական գումարտակի հիմնադիր Արմեն Սարգսյանը: Ավելի ուշ լրատվամիջոցները հայտնեցին, որ նա մահացել է հիվանդանոցում։

Քրեական գործ է հարուցվել վտանգավոր եղանակով սպանության, երկու և ավելի անձանց սպանության փորձի և զենքի ապօրինի շրջանառության հոդվածներով:
46-ամյա Արմեն Սարգսյանը հայտնի է նաև որպես Արմեն Գորլովսկի, Գորլովկայում (ԴԺՀ) զբաղվել է մարտիկների պատրաստմամբ: