Վրաստանում տեղի է ունեցել էլեկտրաէներգիայի լայնածավալ վթարային անջատում․ Թբիլիսիում և Ռուսթավիում հնարավոր են ջրամատակարարման խափանումներ

Հուլիսի 24-ի գիշերը՝ մոտ 00:10-ին, Վրաստանի ամբողջ տարածքում տեղի է ունեցել էլեկտրաէներգիայի վթարային անջատում։ Այս մասին հայտնել է Վրաստանի Պետական էլեկտրահամակարգը։

Գերատեսչության տեղեկացմամբ՝ վերականգնողական աշխատանքներն արդեն ընթանում են, իսկ էլեկտրամատակարարումը վերականգնվում է փուլ առ փուլ։ Այս պահին էլեկտրաէներգիան արդեն մասնակի վերականգնվել է Մցխեթա-Մթիանեթի շրջանում և Թբիլիսիի մի հատվածում։

Պետական էլեկտրահամակարգը նաև հայտարարել է, որ վթարի պատճառների վերաբերյալ տարածվում է ապատեղեկատվություն։ Գերատեսչությունը կոչ է արել լրատվամիջոցներին և հանրությանը հենվել միայն պաշտոնական տեղեկատվության վրա և չտարածել չհաստատված տեղեկություններ։

Էլեկտրաէներգիայի լայնածավալ անջատման ճշգրիտ պատճառը դեռ պարզվում է։ Հետաքննության արդյունքների մասին լրացուցիչ կտեղեկացվի։

Էլեկտրաէներգիայի համապետական անջատման պատճառով GWP (Georgian Water and Power) ընկերությունը նույնպես հայտնել է պոմպակայանների աշխատանքի դադարեցման մասին։ Արդյունքում Թբիլիսիի և Ռուսթավիի բնակիչների մի մասի մոտ հնարավոր են ջրամատակարարման սահմանափակումներ կամ ջրի ճնշման նվազում։

Ընկերությունից հայտնել են, որ տեխնիկական խմբերը աշխատում են արտակարգ ռեժիմով, իսկ ջրամատակարարումն ամբողջությամբ կվերականգնվի պոմպակայաններին էլեկտրաէներգիայի մատակարարումը վերականգնվելուց անմիջապես հետո։

Աղբյուրը՝ vectornews.ge-ի