ԹՐԻՓՓ-ը քաղաքական բլեֆ է, բայց դրա հետևանքով Հայաստանը կարող է հայտնվել Իրանի թշնամական երկրների ցուցակում․ Վազգեն Պետրոսյան
Միացյալ Նահանգներն այս պահին ի վիճակի չէ Իրանի դեմ լայնամասշտաբ ռազմական գործողություններ իրականացնելու։ Այս մասին «Փաստինֆո»-ի հետ զրույցում ասաց «Հայաստանի ժողովրդական շարժման» համակարգող, թյուրքագետ Վազգեն Պետրոսյանը։
Նրա դիտարկմամբ՝ 40-օրյա պատերազմի ընթացքում Միացյալ Նահանգները սպառել է իր համաշխարհային հակաօդային պաշտպանության համակարգի հրթիռների զգալի մասը և այժմ չունի անհրաժեշտ պաշարներ։
«Այդ պատճառով ճիշտ չէ ասել, թե Միացյալ Նահանգներն այժմ ցանկանում է մտնել խոշոր պատերազմի մեջ։ Առավել ևս, որ չունի նման ծրագրի իրականացման բավարար հնարավորություններ։ Նրանք, ամենայն հավանականությամբ, կսահմանափակվեն Պարսից ծոցի տարածաշրջանում գտնվող նավերի և կղզիների վրա հարձակումներով՝ միաժամանակ փորձելով հրահրել ներքին անհանդուրժողականություն, անկարգություններ և ապակայունացնել Իրանի ներքին իրավիճակը, որպեսզի հետագայում օգտվեն այդ պայմաններից՝ իրենց նպատակներին հասնելու համար։ Ամեն դեպքում, այս պահին Միացյալ Նահանգները ոչ պատրաստ է, ոչ էլ ի վիճակի՝ լայնամասշտաբ պատերազմ վարելու»,- ասաց նա։
Անդրադառնալով Իսլամական հեղափոխության պահապանների կորպուսի (ԻՀՊԿ) հայտարարությանը, ըստ որի՝ Իրանի շահերին հակասելու դեպքում ԹՐԻՓՓ նախագիծը կբախվի Թեհրանի կշռադատված հակազդեցությանը, Պետրոսյանը նշեց, որ չի կարծում, թե Իրանը ներկայում ունի անհրաժեշտ հնարավորությունները, ներուժը կամ ազդեցության լծակները՝ այդ նախագծին խոչընդոտելու համար։
«Սակայն կարծում եմ, որ ԹՐԻՓՓ-ը խոշոր քաղաքական բլեֆ է և չի կարող իրականանալ այն տեսքով, ինչպես այն ներկայացնում են Միացյալ Նահանգներն ու Հայաստանի կառավարությունը։ Այս ձևաչափով այն չի կայանա։
Երբ փոխվում է համաշխարհային համակարգը, հիմնական պայքարը գնում է ենթակառուցվածքների նկատմամբ վերահսկողության համար։ Միացյալ Նահանգների գլխավոր մրցակիցը Չինաստանն է, և ԱՄՆ-ն չի կառուցի այնպիսի ճանապարհ կամ ենթակառուցվածք, որից հետագայում կօգտվի Չինաստանը։ Այդ պատճառով այս նախագիծն օգտագործվելու է որպես առևտրի և բանակցությունների գործիք։
ԹՐԻՓՓ-ը ներկայիս տեսքով չի իրականանալու։ Միացյալ Նահանգների հիմնական նպատակը տարածաշրջանում Թուրքիայի հզորացումն է՝ Ռուսաստանի և Իրանի ազդեցությանը հակակշիռ ստեղծելու համար, որպեսզի տարածաշրջանում իր ռազմական, մարդկային և ֆինանսական ծախսերը հասցնի նվազագույնի։
Այս պայմաններում նրանք ԹՐԻՓՓ նախագծում լուրջ ներդրումներ չեն կատարի։ Կարող են ներդնել մի քանի տասնյակ կամ նույնիսկ հարյուրավոր միլիոն դոլար, սակայն հետագայում այն մի քանի միլիարդ կամ տասնյակ միլիարդ դոլարով վաճառել առավել շահագրգիռ կողմերին՝ նկատի ունեմ Չինաստանին և Ռուսաստանին։
Ինչ վերաբերում է ԻՀՊԿ-ի հայտարարությանը, կարծում եմ՝ այն քաղաքական հայտարարություն է, որը ցույց է տալիս Իրանի դիրքորոշումն ու միաժամանակ զգուշացնում է Հայաստանի Հանրապետությանը, որ այս ճանապարհով շարունակելու դեպքում Հայաստանը կարող է հայտնվել Իրանի թշնամական երկրների ցուցակում»,- եզրափակեց Պետրոսյանը։
Հետևեք մեզ Viber-ում
