Կյանքի գնով անգամ կպայքարի

«Սասուն» ջոկատի հրամանատար, «Քաղաքացիական պայմանագրի» կառավարման խորհրդի անդամ Սասուն Միքայելյանը կրկին պայքարելու է, բայց այս անգամ  հայրենի Հրազդան քաղաքի բարեկեցության համար: Ազատամարտիկը կրկին անգամ որոշել է քաղաքապետ դառնալ (1996-99-ին Սասուն Միքայելյանը եղել է Հրազդանի քաղաքապետ): «Թեկնածությունս առաջադրում եմ, որ քաղաքի վիճակը լավանա: Հրազդանը բազմաթիվ խնդիրներ ունի, որոնք տարիներ շարունակ չեն լուծվել, ես այդ խնդիրները կլուծեմ: Բացի այդ, մոտ 60% երիտասարդ եմ բերելու, որ կառավարումը փոխանցվի երիտասարդներին»: Նշենք, որ ապրիլի 17-ին Հրազդան քաղաքում տեղի են ունենալու քաղաքապետի ընտրություններ: Նախնական տվյալներով` կպայքարեն  Հրազդանի գործող ՀՀԿ-ական քաղաքապետ Արամ Դանիելյան, նախկին պատգամավոր, Հրազդանի նախկին քաղաքապետ, «Քաղաքացիական պայմանագրի» կառավարման խորհրդի անդամ Սասուն Միքայելյան և «Հայկական վերածնունդ» կուսակցության անդամ, ՕԵԿ մամուլի նախկին խոսնակ Արթուր Միսակյան: «Կյանքիս գնով էլ լինի պահելու եմ  ժողովրդի քվեն: Հրազդանցին գիտի, թե ում կընտրի: Ես նախընտրական լուրջ ծրագրեր ունեմ ու պատրաստվում եմ դրանք իրականություն դարձնել:Հրազդանցիները ինձ լավ են ճանաչում ու գիտեն, որ խոսքիս տերն եմ »,-նկատեց Սասուն Միքայելյանը: Միքայելյանի փոխանցմամբ՝  Նիկոլ Փաշինյանն է  լինելու  իր  նախընտրական շտաբի պետը: Աստղիկ Ավագյան