Այժմ, երբ այստեղ եմ, ամեն ինչ կանեմ, որ «Արսենալը» պատմություն կերտի. Հենրիխ Մխիթարյան
Հայաստանի հավաքականի կիսապաշտպան Հենրիխ Մխիթարյանն առաջին հարցազրույցն է տվել «Արսենալի» ֆուտբոլիստի կարգավիճակում: - Շնորհավորում եմ «Արսենալ» տեղափոխվելու առթիվ: Ինչպե՞ս եք ձեզ զգում «Արսենալում»: - Շատ ուրախ եմ, որ այս գործարքն ավարտին հասցրեցինք: Ուրախ եմ, որ այստեղ եմ: Միշտ երազել եմ խաղալ «Արսենալում»: Այժմ, երբ այստեղ եմ, ամեն ինչ կանեմ, որ այս ակումբը պատմություն կերտի: - Դուք 2009 թվականին ՈւԵՖԱ-ի պաշտոնական կայքի հետ զրույցում ասել էիք, որ ցանկանում եք խաղալ «Արսենալում»: Ինչո՞ւ էիք այն ժամանակ հիանում այս թիմով: - Ինձ միշտ դուր է եկել «Արսենալի» խաղը և, թե ինչպես է Արսեն Վենգերը ղեկավարում թիմը: Այն ժամանակ թիմում շատ երիտասարդներ կային, սակայն նա կարողանում էր ղեկավարել նրանց և դա շատ լավ էր անում: Իհարկե, սիրահարված էի Թիերի Անրիի խաղին: Ինձ դուր էր գալիս, թե նա ինչպես է գործում, միգուցե, դա պատճառ դարձավ, որ աջակցեմ «Արսենալին»: - Ի՞նչն էր հատկապես տպավորում Անրիի խաղում: - Նա շատ գոլեր էր խփում, բայց խաղում էր թիմային ֆուտբոլ: Նա հերոսի էր նման: - «Արսենալի» այն երկրպագուների համար, ովքեր Ձեզ լավ չեն ճանաչում, ի՞նչ կարող եք ասել Ձեր մասին: - Ի՞նչ կարող եմ ասել: Լավ կլինի, որ ոչինչ չասեմ: Դա կանեմ ֆուտբոլ խաղալով: - Դուք հարձակվողական ոճի բազմաֆունկցիոնալ կիսապաշտպան եք: Բայց ո՞րն էր Ձեր նախընտրելի դիրքը: - Դա ինձ համար կարևոր չէ: Ես մի դիրքում չեմ մնում, այլ ձգտում եմ անընդհատ տեղաշարժվել, որպեսզի տարածություն ստեղծեմ թիմակիցներիս համար: Ես ամենուր եմ: - Որո՞նք են Ձեր խաղային լավագույն որակները: - Չգիտեմ: Ավելի լավ է այդ հարցը մարզիչին տաք: -Ու՞մ հետ կցանկանայիք խաղալ «Արսենալում»: - Յուրաքանչյուրի: Որևէ բացառություն չկա: Ցանկանում եմ բոլորի հետ խաղալ, որ հնարավորինս շուտ հասկանանք միմյանց:
Հետևեք մեզ Viber-ում
