Սրբուհի Գալյա՛ն, լսեք այս ապօրինությունների մասին․ Լիլիթ Աղեկյան (video)

ՀՀ արդարադատության նախարար Սրբուհի Գալյանին
Դիմում
դատավոր Վարսենիկ Մելքոնյանի գործողությունների օրինականության հարցը քննության առարկա դարձնելու վերաբերյալ
Մեղադրյալի՝ քրեական գործի նյութերին ծանոթանալու և դրանց պատճենահանման իրավունքի սահմանափակումը հանդիսանում է պաշտպանության իրավունքի և արդար դատաքննության իրավունքի (Մարդու իրավունքների և հիմնարար ազատությունների եվրոպական կոնվենցիայի 6-րդ հոդված) կոպիտ խախտում։
Երբ այս արգելքը դրվում է դատավորի կողմից, դա որակվում է որպես դատավարական կարգի խախտում և իշխանության չարաշահում։
Հայաստանի Հանրապետության քրեական դատավարության օրենսգիրքը հստակ ամրագրում է մեղադրյալի իրավունքը՝ ծանոթանալու գործի բոլոր նյութերին և ստանալու դրանց պատճենները։
«Լամին ընդդեմ Բելգիայի» (Lamy v. Belgium) գործով Մարդու իրավունքների եվրոպական դատարանի (ՄԻԵԴ) վճռի համաձայն` պաշտպանության կողմի՝ գործի նյութերին ծանոթանալու իրավունքը և «զենքերի հավասարության» սկզբունքը հանդիսանում են արդար դատաքննության սկզբունքներ: Այս վճիռը հաճախ մեջբերվում է որպես նախադեպ այն մասին, որ դատարանը պետք է ապահովի պաշտպանության կողմին տրամադրվող նյութերի լիարժեք հասանելիությունը:
Հարգելի տիկին Գալյան,
Ձեր ուշադրությունն եմ հրավիրում սույն խնդրանքին և պահանջում հետամուտ լինել սույն դեպքին և ձեռնարկել օրենքով սահմանված համապատասխան գործողություններ ՀՀ Շիրակի մարզի առաջին ատյանի ընդհանուր իրավասության դատարանի դատավոր Վարսենիկ Մելքոնյանի նկատմամբ, որի վարույթում է գտնվում թիվ ՇԴ/0522/01/25 գործը:
Թիվ ՇԴ/0522/01/25 գործով մեղադրյալ Լիլիթ Աղեկյան
03 հուլիս, 2026 թվական