Ինչով է բացատրվում Արմեն Սարգսյանի «սեթևեթանքը»

ԱԺ ՀՀԿ խմբակցության ղեկավար Վահրամ Բաղդասարյանի համար տարօրինակ է «Ելք»-ի այն մոտեցումը, որ իրենք դեմ են քվեարկելու Արմեն Սարգսյանի թեկնածությանը զուտ միայն այն պատճառով, որ նրան առաջադրել է ՀՀԿ-ն: «Հետաքրքիր է, եթե Արմեն Սարգսյանը չլիներ Հանրապետականի թեկնածուն, ապա «Ելք»-ն ի՞նչ դիրքորոշում կունենար»,- խորհրդարանական ճեպազրույցների ժամին ասաց Բաղդասարյանը: «Ելք»-ի այն դիտարկմանը անդրադառնալով, թե Հանրապետականը կարող էր աջակցել իրենց, անհրաժեշտ 18 ստորագրությունն ապահովել, որ իրենք էլ իրենց թեկնածուին առաջադրեին, ՀՀԿ-ականը նշեց. «Մենք չպետք է այդ հնարավորությունը տայինք։ Ընդդիմադիր մեր քաղաքական ուժերի ձայները բավարարում են, որ կարողանան մեկ քառորդ ստորագրությունով իրենց թեկնածուին ներկայացնեն։ Խնդիրն իրենց մեջ պետք փնտրել ու իրենց բանակցությունների արդյունքում պիտի կարողանային թեկնածու առաջադրել»: Լրագրողներից մեկը հետաքրքրվեց, թե ինչով է բացատրում Արմեն Սարգսյանի «սեթևեթանքը»՝ ժամանակ խնդրել որոշում կայացնելու համար, և հնարավոր համարո՞ւմ է, որ նա կմերժի Սերժ Սարգսյանի առաջարկը։ «Ես կարծում եմ, որ լրագրողները և հանրությունն այդքան լուրջ չեն վերաբերվի, որ ՀՀ չորրոդ նախագահի թեկնածու առաջադրվի, և մեկ խոսակցության ընթացքում, մի քանի վայրկյանում լինի համաձայնություն։ Բնականաբար, թեկնածուն պետք է կշռադատի, նա պետք է հանդիպի քաղաքական ուժերի հետ, հանրության հետ, որպեսզի իր հնարավորությունները, իր մոտեցումները կարողանա դրսևորել և ինքն իր համար հասկանա՝ դա ընդունելի՞ է, թե՞ ընդունելի չէ, և նոր պետք է պատասխան տա»,- ասաց Վահրամ Բաղդասարյանը։