Մահացել է ՀՀ ժողովրդական արտիստ Ռաիսա Մկրտչյանը

84 տարեկան հաասակում մահացել է ՀՀ ժողովրդական արտիստ, Մովսես Խորենացու մեդալակիր, «Հայրենիքին մատուցած ծառայությունների համար» 1-ին աստիճանի շքանշանակիր Ռաիսա Մկրտչյանը։

Հայ էստրադային երգչուհի, ՀՀ ժողովրդական արտիստ Ռաիսա Մկրտչյանը ծնվել է 1942 թվականի փետրվարի 25-ին։ Ավարտել է Երևանի Ռոմանոս Մելիքյանի անվան երաժշտական ուսումնարանի, ապա՝ Երևանի Կոմիտասի անվան պետական կոնսերվատորիայի դաշնամուրային բաժինը։ Ուսմանը զուգահեռ երգել է «Յուննոստ», «Կռունկ» և այլ երիտասարդական էստրադային նվագախմբերում։

Նա Առնո Բաբաջանյանի, Կոնստանտին Օրբելյանի, Մարտին Վարդազարյանի և մի շարք այլ հայտնի հայ կոմպոզիտորների ստեղծագործությունների առաջին կատարողներից էր։ Ռադիոյի և հեռուստատեսության ոսկե ֆոնդում պահպանվում են նրա կատարմամբ ավելի քան 400 երգեր։

Տասնամյակներ շարունակ Ռաիսա Մկրտչյանը եղել է հայկական էստրադայի ամենավառ դեմքերից մեկը։ Նրա կատարմամբ հնչել են Առնո Բաբաջանյանի, Կոնստանտին Օրբելյանի, Մարտին Վարդազարյանի, Ալեքսեյ Հեքիմյանի, Ռոբերտ Ամիրխանյանի և բազմաթիվ այլ հեղինակավոր կոմպոզիտորների ստեղծագործություններ։ Նրա երգերը լայն ճանաչում են ստացել ոչ միայն Հայաստանում, այլև Խորհրդային Միության բազմաթիվ հանրապետություններում և արտերկրում։

Ռաիսա Մկրտչյանն արժանացել է ՀՀ ժողովրդական արտիստի կոչմանը, պարգևատրվել էր «Մովսես Խորենացի» մեդալով և «Հայրենիքին մատուցած ծառայությունների համար» 1-ին աստիճանի շքանշանով՝ հայկական երգարվեստում ունեցած նշանակալի ավանդի համար։