Ռուսաստանը սահմանափակել է Հայաստանից ձկնային արտադրանքի ներմուծումը

Ռուսաստանը ընդլայնել է Հայաստանից ձկնային արտադրանքի մատակարարումների նկատմամբ սահմանափակումները՝ ժամանակավորապես կասեցնելով ևս երկու հայկական ընկերության արտադրանքի սերտիֆիկացումը։ Որոշումը կգործի մինչև նախկինում արձանագրված խախտումների վերացումը։ Այս մասին հայտնել են Ռոսսելխոզնադզորում։

Արդյունքում, ժամանակավորապես կասեցվել է Հայաստանից Ռուսաստան ձկնային արտադրանքի ամբողջ արտահանումը։

Գերատեսչությունը հիշեցրել է, որ ավելի վաղ համակարգային խախտումների պատճառով դիմել էր հայկական կողմին՝ խնդրելով ժամանակավորապես դադարեցնել բոլոր ձկնային արտադրանքի սերտիֆիկացումը՝ բացառությամբ երկու ընկերությունների, որոնք անմիջականորեն մասնակցել էին ստուգումներին։

«Հետագայում, ստացված նյութերի ուսումնասիրությունից հետո, կազմվել է նախնական հաշվետվություն, և մինչև հայտնաբերված խախտումների վերացումն ու անհրաժեշտ հաստատող փաստաթղթերի ներկայացումը որոշում է կայացվել ժամանակավորապես կասեցնել նաև այդ ընկերությունների արտադրանքի սերտիֆիկացումը», — հայտնել են Ռոսսելխոզնադզորից։

Գերատեսչությունում նաև ընդգծել են, որ շարունակում են համագործակցել հայկական կողմի հետ՝ ռուսական շուկա մատակարարվող ձկան և ձկնային արտադրանքի անվտանգության ապահովման ուղղությամբ։