Արտենիի ողբերգական վթարի մասնակից բեռնատարի վարորդը նոր է զորացրվել, գնում էր դաշտից խոտը տուն բերելու

Արագածոտնի Արտենի գյուղի տարածքում այսօր՝ հունիսի 22–ին տեղի ունեցած ողբերգական ավտովթարից նոր մանրամասներ են հայտնի դարձել։

NEWS.am—ի տեղեկություններով բեռնատարի վարորդը եղել է Արտենի գյուղի բնակիչ Նարեկ Մ.–ն։ Վերջինս 1-2 տարի առաջ է զորացրվել, նա վաղ առավոտյան գնում էր դաշտ խոտը հավաքելու. «Առավոտից գնացել էր իրենց դաշտից քաղած խոտը բարձեին բեռնատարն ու բերեին տուն»,–ասաց Արտենիի բնակիչը։

Բեռնատարի վարորդը լուրջ վնասվածքներ չունի, բնակիչները հայտնեցին, որ Քննչական են հրավիրել՝ հարցաքննության։

NEWS.am–ի տեղեկություններով այս պահի դրությամբ վիրավորների մեծ մասը, որոնք կանայք են և բանվորական «Գազելով» գնում էին աշխատանքի, գտնվում են «Արմավիր» ԲԿ–ում։

Ավելի վաղ NEWS.am—ը հայտնել էր, որ այսօր՝ հունիսի 22-ին, խոշոր ու ողբերգական ավտովթար է տեղի ունեցել Արագածոտնի մարզում։ Ժամը 06։00-ի սահմաններում Գյումրի-Քարակետ մայրուղու Արտենի գյուղի վարչական տարածքում բախվել են մարդատար «Գազել» մակնիշի ավտոմեքենան ու «Զիլ» մակնիշի բեռնատարը։

Բախման հետևանքով «Գազել»-ը դուրս է եկել երթևեկելի գոտուց և գլխիվայր հայտնվել դաշտում։ Վթարի հետևանքով 1 հոգի տեղում մահացել է, 11 հոգի, որոնց առաջինը օգնության են հասել քաղաքացիները, տեղափոխվել են «Թալին» բժշկական կենտրոն։

Այս ավտովթարի հետևանքով մահացածը կին է, նա եղել է «Գազել»–ում, որով տեղափոխում էին աշխատողներին. նրանք գնում էին ծիրան հավաքելու։

Վիրավորներից մի քանիսին «Թալին» բժշկական կենտրոնում անհրաժեշտ բուժօգնություն ցուցաբերելուց հետո ռեանիմոբիլով տեղափոխել են Երևանի մասնագիտացված տարբեր հիվանդանոցներ։

Առողջապահության նախարարությունից էլ հայտնել են, որ վթարի հետևանքով հոսպիտալացվել է 11 տուժած, որից երեքը գտնվում են վերակենդանացման բաժանմունքում, նրանց առողջական վիճակը գնահատվում է ծայրահեղ ծանր։

5 քաղաքացու առողջական վիճակը ծանր է, 3-ինը` թեթև: Մարզային բուժկենտրոններում ստանում են անհրաժեշտ բուժօգնություն: