Ուժայինների պայքար, թե՞ նախընտրական ակցիա

Կամո Փիրուզյանի սպանությունը կազմակերպելու կասկածանքով այսօր ձերբակալվել է քրեական հեղինակություն Ալավերդցի Վահագն Աբգարյանը, եւս երկու հոգի, որոնք համարվում են Աբգարյանի մտերիմները եւ աջակցություն են ցուցաբերել սպանությունը կազմակերպելու գործին: Վանաձորի հայտնի կլաններից մեկի պարագլուխ Վահագն Աբգարյանը, հիշեցնենք, անցնում է Թուֆենկյանի մոտ անցած աշնանը հնչած կրակոցների միջադեպով, որի ժամանակ սպանվել էր Աբգարյանի թիկնապահը, իսկ Աբգարյանը վիրավորվել։Կամո Փիրուզյանը սպանվել է 2017 թվականի հունիսի 13-ին, օրը ցերեկով: 26-ամյա Վլադիմիր Դավթյանն Ալավերդի քաղաքում կրակոցներ էր արձակել նրա ուղղությամբ, ապա նաև՝ ոտքերով հարվածել տուժողի մարմնի տարբեր մասերին: Դավթյանը ձերբակալվել էր, սակայն սպանությանն օժանդակելու մեջ իսկզբանե կասկածվող Վահագն Աբգարյանի մտերիմներից մեկը՝ ոչ։ Աբգարյանի անունը կապվում է Ալավերդիում մի շարք աղմկահարույց դեպքերի հետ։ Արյունոտ միջադեպերի եւ վենդետաների շղթայի սկիզբը գալիս է 2015 թվականից, երբ Ալավերդիում տեղի ունեցան քաղաքապետի ընտրություններ, հետագայում մրցակիցները դարձան ոխերիմ թշնամիներ ու, ցավալիորեն, մի քանի զոհ են տվել հաջորդիվ տարիներին։ Քաղաքապետի աթոռի համար այդ ժամանակ պայքարում էին անկուսակցականներ՝ Լոռիիում հայտնի «Լալվար» քարի արտադրամասի տնօրեն Արթուր Աբգարյանը եւ Սանահինի մեքենայացված գծային ուղեմասի պետ, ներկայիս ՀՀԿ-ական քաղաքապետ Կարեն Փարեմուզյանը։ Ձերբակալված Աբգարյանը քաղաքապետի թիմից է։ Ընտրություններից հետո իր տան շքամուտքում հարձակման էր ենթարկվել թեկնածու Արթուր Աբգարյանի ընկերներից Վարդան Անտոնյանը. Վահագն Աբգարյանի թիկնապահները մետաղյա ձողով մի քանի հարվածներ էին հասցրել նրա գլխին։Վենդետան չուշացավ, մի քանի ամիս հետո Անտոնյանը կրակահերթեր է արձակել Վահագն Աբգարյանի զրահապատ ավտոմեքենայի ուղղությամբ։ Սակայն իրավապահների ամենաթողության պայմաններում պատմությունն այսքանով չավարտվեց։ Մեկ տարի հետո սպանեցին Վահագն Աբգարյանի երկու ընկերներին։ Սպանությունը տեղի էր ունեցել Արթուր Աբգարյանի թիմակցի՝ Վարդան Փիրուզյանի տան մոտ: Կային տեղեկություններ, որ սպանվողներն իրենք են նախահարձակ եղել, ինչին հետեւել էր Փիրուզյանի կոմղից արձակված կրակահերթը։ Վահագնի թիկնապահների սպանությունից մեկ տարի անց՝ 2017 թվականին սպանվեց Վարդան Փիրուզյանի եղբայրը՝ Կամո Փիրուզյանը, եւ հենց նրա սպանությունը կազմակերպելու մեղադրանքով էլ այսօրվա ձերբակալություններն եղան։ Մի խոսքով՝ հանցագործությունների մի մեծ կծիկ, որը տարիներ շարունակ մնացել է չբացահատված՝ տուրք տալով նոր հանցանքների։ Կամո Փիրուզյանի պաշտպանները ուշագրավ է, որ Փիրուզյանի պաշտպաններ Երվանդ Վարոսյանն ու Լուսինե Սահակյանը նոր զարգացումները պայմանավորում են իրավապահ մարմինների բազմակողմանի քննության արդյունք, մասնավորապես, ըստ նրանց բացատրության սայլը տեղից շարժվել է, երբ գործը ՀՀ Քննչական կոմիտեի Լոռու քննչական վարչությունից ՀՀ գլխավոր դատախազության միջամտությամբ տեղափոխվել է ՀԿԳ քննության գլխավոր վարչություն ․« Այս գործով ևս ի սկզբանե ակնհայտ անբավարար էր ոստիկանության կողմից իրականացվող աշխատանքի որակը, որի պարագայում ակնհայտ էր որ հանցագործությունը այդպես էլ լիարժեք չէր բացահայտվելու, հանցակիցների հիմնական մասը, այդ թվում և կազմակերպիչը խուսափելու էին պատասխանատվությունից: Սույն գործով վերջին զարգացումները հիմք են տալիս կարծելու, որ Կամո Փիրուզյանի սպանությունը հնարավոր է լիարժեք բացահայտվի, և որ պատասխանատվությունից չեն խուսափի բոլոր հանցակիցները: Տիրապետելով քրեական գործի նյութերի զգալի մասին, դեպքին նախորդող ու հաջորդող ժամանակահատվածում Ալավերդի քաղաքում ծավալվող իրադարձություններին, կարող ենք փաստել, որ գործով նման զարգացումը հնարավոր էր միայն ՀՀ գլխավոր դատախազության, ՀՀ ԱԱԾ և Քննչական կոմիտեի ՀԿԳ քննության գլխավոր վարչության համագործակցված արհեստավարժ աշխատանքի արդյունքում: Համոզված ենք նաև, որ Կամո Փիրուզյանի սպանության լիարժեք քննությունը կհանգեցնի Ալավերդի քաղաքում տարիներ շարունակ իրականացվող բռնի հանցագործությունների, այդ թվում սպանությունների դադարեցմանը» նշում են նրանք իրենց տարածած հայտարարության մեջ։ Մինչդեռ չի բացառվում, որ սա հերթական «փիառ» քայլն էր Սերժ Սարգսյանի վարչապետությանն ընդառաջ։ Անի Սահակյան