«Զատիկ» կենտրոնի աշխատակիցները ընտրություններից առաջ 55 հազար դրամ խրախուսում են ստացել

«Իշխանություն» լրատվականը հայտնում է, որ իր ձեռքի տակ է հայտնվել փաստ առ այն, որ Երևանի «Զատիկ» երեխաների աջակցության կենտրոն պետական ոչ առևտրային կազմակերպության (ՊՈԱԿ) տնօրենի ժամանակավոր պաշտոնակատար Հասմիկ Մանուկյանը ընտրությունների նախաշեմին խրախուսել է կենտրոնի աշխատակիցներին։ Խրախուսման արդյունքում ՊՈԱԿ-ի աշխատակիցներից յուրաքանչյուրը ստացել է 55 հազար դրամ։

Ստացված տեղեկությունը ճշտելու և պարզաբանում ստանալու նպատակով «Իշխանություն» լրատվականը փորձեց կապ հաստատել կենտրոնի տնօրենի ժամանակավոր պաշտոնակատար Հասմիկ Մանուկյանի հետ։ Մեր առաջին զանգին պատասխանած աշխատակիցը վստահեցրեց, որ տնօրենի պաշտոնակատարն անձամբ կզանգահարի մեզ, սակայն այդպես էլ որևէ արձագանք չեղավ։ Ավելի ուշ, երբ կրկին փորձեցինք կապվել Հասմիկ Մանուկյանի հետ, կենտրոնից պատասխանեցին, թե նա տեղում չէ։

«Իշխանություն» լրատվականի հետ զրույցում Աշխատանքի և սոցիալական հարցերի նախարարությունից հաստատեցին մեր տեղեկությունը՝ կենտրոնի աշխատակիցները խրախուսումներ ստացել են։ Նախարարությունից հավելեցին, որ նման խրախուսումները պարբերաբար են եղել՝ տարեկան մի քանի անգամ։ Մեր այն հարցին, թե վերջին անգամ երբ են նման խրախուսում ստացել ՊՈԱԿ-ի աշխատակիցները, նախարարությունից պատասխանեցին՝ հստակ չենք կարող ասել, հարցում ուղարկեք։

«Իշխանություն» լրատվականին տեղեկությունը փոխանցած անձը, սակայն, վստահեցնում է՝ խրախուսումը բնավ պատահական չէ, այն տրվել է ՔՊ-ի օգտին քվերակելու համար։