«Ելք»-ը չի մոռացել
«Երթով մենք կոնկրետ խնդիր ենք դնում՝ փոփոխություններ կատարել Հարկային օրենսգրքում, հարկային դրույքաչափերն ու բեռը իջեցնել: Այսօր մեր խնդիրը շատ կոնկրետ է՝ քայլել ընդդեմ թանկացումների», - այսօր Ելքի հավաքի ժամանակ նշեց Նիկոլ Փաշինյանը: Նա նշեց, որ իրենց քննադատում ու ասում են՝ թանկացումների դեմ են պայքարում, փոխանակ քաղաքական պահանջներ առաջադրեն:«Բայց մի՞թե թանկացումները ընդամենը սոցիալական խնդիր են պարունակում: Ամենևին ոչ, որովհետև այս թանկացումները, այս հարկային բեռի ավելացումը նշանակում է, որ ՀՀ քաղաքացիներն ավելի ամուր են կանգնելու 10 հազար դրամանոց շղթաներով: Մեր քաղաքական խնդիրը, որը մենք հիմա ձևակերպում ենք, հետևյալն է՝ մենք ուզում ենք ՀՀ քաղաքացիներին դարձնել ՀՀ քաղաքական, տնտեսական կյանքի վճռական գործոն: Մենք ուզում ենք ասել, որ պատրաստ ենք Հայաստանի քաղաքացիներին առաջնորդել դեպի հաղթանակներ»,- ասաց Փաշինյանը: Փաշինյանը նկատեց, որ իրենք դնում են հետևյալ քաղաքական խնդիրը՝ քաղաքացիներին դարձնել ՀՀ տնտեսական, քաղաքական կյանքի վճռական գործոն: Նրա խոսքով՝ «Ելք»-ը չի մոռացել իր պարտավորությունների մասին, այն է՝ օգնել ՀՀ քաղաքացիներին դուրս գալ ՀՀԿ-ի փորած հուսահատության փոսից: «Մենք ձեռք ենք մեկնում: Բռնեք այդ ձեռքը, դուրս եկեք փողոց, ցույց տվեք ձեր տեր լինելը: Դուք եք վճառական ուժը ՀՀ-ում», - նշեց Փաշինյանը:
Հետևեք մեզ Viber-ում
