Արմատական կաթոլիկների մասին փաստաթղթի շուրջ ծագած սկանդալից հետո ՀԴԲ-ն աշխատանքից հեռացրել է իր վերլուծաբաններին․ CBS News

ԱՄՆ Հետաքննությունների դաշնային բյուրոն (ՀԴԲ) աշխատանքից հեռացրել է 2023 թվականի զեկույցների պատրաստմանը մասնակցած առնվազն հինգ վերլուծաբանի։ Փաստաթուղթը վերաբերում էր «արմատական ավանդապաշտ կաթոլիկությանը» և դրա հնարավոր կապերին ծայրահեղական գաղափարախոսությունների հետ։ Այս մասին հայտնում է CBS News-ը՝ հղում անելով իրազեկ աղբյուրներին։

Խոսքը «Ռիչմոնդի հուշագրի» մասին է, որը պատրաստվել էր Ռիչմոնդում ՀԴԲ-ի տարածքային գրասենյակի կողմից։ Փաստաթղթում դիտարկվում էին էթնիկ դրդապատճառներով գործող ծայրահեղականների և կաթոլիկ միջավայրում առկա արմատական կրոնական հայացքների հնարավոր կապերը։

Այն բանից հետո, երբ փաստաթուղթը շրջանառությունից հանվել է ՀԴԲ-ի նախկին տնօրեն Քրիս Ռեյի օրոք, անցկացվել է ներքին քննություն։ Դրա արդյունքում պարզվել է, որ հեղինակների գործողություններում չարամիտ միտումներ չեն եղել, սակայն նշվել է, որ զեկույցը չի համապատասխանել մասնագիտական որոշակի ստանդարտների և վերլուծական սխալներ է պարունակել։

Ստուգումների արդյունքներով ներդրվել են շտկողական մեխանիզմներ՝ ուղղված վերլուծական նյութերի հաստատման ընթացակարգերի խստացմանը։ Իսկ հուշագրի պատրաստմանը մասնակցած աշխատակիցներին սկզբում տրվել են կարգապահական նկատողություններ։

Այդ ժամանակ Արդարադատության նախարարության գլխավոր տեսուչի կողմից անցկացված առանձին քննությունը նույնպես որևէ ապացույց չի գտել այն մասին, որ վերլուծաբաններին հրահանգվել է կապեր փնտրել ծայրահեղականների և կրոնական խմբերի միջև, կամ որ նրանց աշխատանքում եղել են խտրական դրդապատճառներ։

Չնայած դրան՝ փաստաթուղթը քննադատության թիրախ է դարձել նախագահ Դոնալդ Թրամփի կողմնակիցների կողմից, ովքեր պնդել են, որ այն վկայում է պահպանողական կաթոլիկների նկատմամբ կողմնակալ վերաբերմունքի մասին։

Հուշագիրը ներառվել է քրիստոնյաների դեմ ենթադրյալ կողմնակալության հարցերով զբաղվող աշխատանքային խմբի զեկույցում, որը ստեղծվել էր Թրամփի հրամանագրերից մեկի շրջանակներում։

Զեկույցում նշվել է, թե ՀԴԲ-ը «հետաքննել, հետևել և վերլուծել է ավանդապաշտ այն կաթոլիկներին, ովքեր որևէ քրեական հանցագործություն չեն կատարել»։

Բացի այդ, փաստաթղթում քննադատության է ենթարկվել այն փաստը, որ ՀԴԲ-ի վերլուծաբաններն իրենց եզրակացություններում հիմնվել են Southern Poverty Law Center ոչ կառավարական կազմակերպության տվյալների վրա։

Այս ամենից զատ, կազմակերպությունը (SPLC) հայտնվել է ԱՄՆ արդարադատության նախարարության իրավական հարվածի տակ. այն մեղադրվում է տեղեկատուների ֆինանսավորման հարցում դոնորներին մոլորեցնելու մեջ։ SPLC-ն հերքում է այս մեղադրանքները։

Վերլուծաբանների ազատումը կադրային ավելի լայն փոփոխությունների մի մասն է, որոնք անդրադարձել են Թրամփի վարչակազմի կողմից քննադատության արժանացած գործերով զբաղվող աշխատակիցների վրա։

Ավելի վաղ հաղորդվել էր այն աշխատակիցների հեռացման մասին, ովքեր ներգրավված են եղել գաղտնի փաստաթղթերի պահպանման և 2020 թվականի ընտրությունների արդյունքները վիճարկելու փորձերի հետաքննություններում։

Բացի այդ, արդարադատության նախարարությունն ավելի վաղ աշխատանքից ազատել է մի շարք դատախազների, ովքեր զբաղվել են FACE Act-ի (վերարտադրողական առողջության կլինիկաների հասանելիությանը խոչընդոտելու մասին օրենքի) խախտման գործերով։