Հասարակությանը վախեցնում են բանտերով ու ձերբակալություններով, իսկ քարոզարշավին արդեն մեկ զոհ ունենք. իրավապաշտպան

Հասարակությանը ձերբակալություններով և բանտերով վախեցնելը ոչ միայն մարդու իրավունքների խախտում է, այլև հակասում է իշխանությունների տարանջատման սկզբունքին, Aysor.am-ի հետ զրույցում, անդրադառնալով քարոզարշավի և նախընտրական բանավեճերի ընթացքում վարչապետ Նիկոլ Փաշինյանի հայտարարություններին, ասաց իրավապաշտպան Զարուհի Հովհաննիսյանը։

«Գործադիր իշխանության ղեկավարը չի կարող դատավորի կամ իրավապահ համակարգի գործառույթներ իրականացնել և հրահանգել նման գործողություններ»,- նշեց իրավապաշտպանը։

Հովհաննիսյանն առանձնացրեց երկու դեպք, որոնք, իր գնահատմամբ, լուրջ մտահոգությունների տեղիք են տալիս։

Առաջինը վարչապետի նախընտրական պաստառը պոկած այն քաղաքացու դեպքն է, որը հետագայում ինքնասպանություն է գործել, երկրորդը՝ արցախցի Արթուր Օսիպյանի գործը. «Եթե նույնիսկ ամենախիստ իրավական մոտեցմամբ գնահատենք պաստառի պոկման դեպքը, խոսքը կարող էր լինել միայն վարչական իրավախախտման մասին, որի համար նախատեսվում է տուգանք։ Իսկ Արթուր Օսիպյանի պարագայում ընդհանրապես դժվար է խոսել իրավախախտման մասին, առավել ևս՝ քրեական հետևանքներ առաջացնող գործողության»։

Իրավապաշտպանի խոսքով՝ երկու դեպքերում էլ արձանագրվել են մարդու իրավունքների կոպիտ խախտումներ։

«Փաստացի, ընտրարշավի ընթացքում արդեն մեկ զոհ ունենք։ Իսկ Արթուր Օսիպյանի առողջությանը հասցված վնասը կարող է ունենալ երկարաժամկետ և անգամ անդառնալի հետևանքներ։ Հացադուլի 14-րդ օրվանից հետո օրգանիզմում կարող են առաջանալ լուրջ ֆունկցիոնալ խանգարումներ»,- ընդգծեց Հովհաննիսյանը։

Անդրադառնալով վերջին շրջանում արձանագրված բազմաթիվ ձերբակալություններին՝ իրավապաշտպանը շեշտեց, որ նման երևույթները հաճախ ակտիվանում են ընտրություններից առաջ. «Յուրաքանչյուր ընտրությունից առաջ կրկին շրջանառության մեջ է դրվում «նախկինների» թեման, խոսվում է իրավական հետևանքների մասին, և այդ գործընթացները, ինչ-որ կերպ, միշտ համընկնում են ընտրարշավների հետ։ Այդ համատեքստում պետք է դիտարկել նաև ներկայիս ձերբակալություններն ու խստացումները»։

Հովհաննիսյանի կարծիքով՝ նման գործողությունները նպատակ ունեն ցուցադրել ուժ և ստեղծել պատժի անխուսափելիության մթնոլորտ, ինչը, նրա գնահատմամբ, ընդունելի չէ իրավական պետության պայմաններում։

Խոսելով ՄԻՊ-ի աշխատանքի մասին՝ իրավապաշտպանն ընդգծեց. «Այսօրվա Մարդու իրավունքների պաշտպանի աշխատանքը որևէ հստակ արձագանք ու գնահատական չի պարունակում»։