2018-ին մերժում էին, այսօր դարձել են նույն մեթոդների կրողը. քաղաքագետը՝ ընդդիմադիրների բնակարանները խուզարկելու, ձերբակալելու մասին

Իշխանությունները փորձում են առավելագույնս օգտագործել վարչական ռեսուրսը, այն, ինչը իրենք ֆորմալ մերժում էին 2018 թվականին, հիմա դարձել են այդ ամենավատ բարքերի կրողն ու իրականացնողը, Aysor.am-ի հետ զրույցում, անդրադառնալով վերջին օրերին ընդդիմադիրների ձերբակալություններին և «Մեր ձևով» ՀԿ –ի աշխատակիցների բնակարանների խուզարկություններին, ասաց քաղաքագետ Բենիամին Մաթևոսյանը։

Նրա խոսքով՝ իշխանություններն ընտրություններից մի քանի օր առաջ փորձում են կետային հարվածներ հասցնել թե՛ «Ուժեղ Հայաստանին», թե՛ «Հայաստան» դաշինքին։ Քաղաքագետի համոզմամբ՝ նմանատիպ գործողություններ կլինեն նաև ԲՀԿ գրասենյակներում. «Իրեք փորձում են կետային ամենակարևոր դերակատարներին խաղից հանել, ինչը շատ տրամաբանական է։ Հաշվի առնելով այն ազդակները, որոնք գալիս են այդ կառույցներից, նրանք ոչ միայն պատրաստ են այս ամեն ինչին, այլև պայմանականորեն, եթե դու խաղից հանում ես մի հոգու, իրեն փոխարինող այլ անձինք կան։ Աշխատանքները ոչ մի շտաբում կանգ չեն առել, գոնե այս պահի դրությամբ։

Ըստ քաղաքագետի՝ իշխանությունն իր տեսակետից շատ տրամաբանական քայլերի է դիմում. «Ի վերջո, պետք է անկեղծ լինենք, որ իշխանությունները բոլորից լավ են տիրապետում իրական տրամադրություններին։ Իրենք ունեն խնդիր իրենց քաղաքական մոնոպոլիան պահելու առումով և փորձելու են տարբեր մեթոդների դիմել։

Հիմա Էրդողանն ու Եվրահանձնաժողովի նախագահ Ուրսուլա ֆոն դեր Լայենն են շտապում Փաշինյանին օգնության։ Մեկը զանգում է և հետը զրույց է ունենում, հայ և թուրք գործարարների միջև հանդիպում է տեղի ունենում Կարսում։ Առավոտյան Արարատ Միրզոյանը ստորագրեց ԹՐԻՓՓ-ին վերաբերող ևս մեկ պայմանագիր։ Իրենք վերջին այս մի քանի օրերին փորձելու են առավելագույնս երկրի ներսում ճնշել իրենց հակառակորդներին և արտաքին դերակատարները, որոնք այս իշխանության մեջ փայատեր են և շահագրգռված են այս իշխանությունների վերարտադրմամբ, մեր իշխանությունների դրդմամբ, խնդրանքով աջակցություն են ցուցաբերելու։ Սպասենք նման մի քայլ էլ Ադրբեջանից»։