ԱՄԷ-ն Պարսից ծոցի երկրներին միասնության կոչ է արել իրանական հարվածների ֆոնին
ԱՄԷ ղեկավարությունը կոչ է արել Պարսից ծոցի արաբական պետություններին (Բահրեյն, Կատար, Քուվեյթ, ԱՄԷ, Օման, Սաուդյան Արաբիա) կոշտ և միասնական դիրքորոշում ունենալ Բահրեյնի և Քուվեյթի օբյեկտների վրա իրանական գրոհներից հետո անվտանգության ոլորտում ստեղծված իրադրության վերաբերյալ։ «Արմենպրես»-ի փոխանցմամբ՝ այս մասին հայտարարել է ԱՄԷ նախագահի խորհրդականը:
«Պարսից ծոցի պետությունները պետք է վճռական, միասնական և միահամուռ դիրքորոշում ունենան։ Անընդունելի է Պարսից ծոցի որևէ պետության միայնակ թողնել գրոհների դեպքում», – X սոցիալական ցանցում գրել է ԱՄԷ նախագահի խորհրդական Անվար Գարգաշը։
Նա նշել է, որ «ագրեսիան չի թիրախավորում որևէ կոնկրետ երկրի», այլ Պարսից ծոցի բոլոր պետություններին։
Հունիսի 3-ի գիշերը իրանցի և ամերիկացի զինվորականները փոխադարձ հարվածներ են հասցրել։
Մասնավորապես, Իրանը հրթիռներ է արձակել Բահրեյնում և Քուվեյթում գտնվող օբյեկտների ուղղությամբ, սակայն ԱՄՆ զինված ուժերի կենտրոնական հրամանատարության (CENTCOM) պնդմամբ՝ դրանք չեն հասել իրենց թիրախներին։ Միևնույն ժամանակ, Քուվեյթը հայտնել է հարվածների հետևանքով 1 զոհի և վիրավորների մասին։
Հետևեք մեզ Viber-ում
