Այն ժամանակ ՀՀ-ն 100 մլն դոլար էր պարտք ՌԴ-ին՝ ԱԷԿ-ի վերականգնման համար․ Քոչարյանը «գույք՝ պարտքի դիմաց» ծրագրի մասին

Հայաստանի երկրորդ նախագահ, «Հայաստան» դաշինքի վարչապետի թեկնածու Ռոբերտ Քոչարյանը պատմել է, թե ինչու էր անհրաժեշտ «Գույք՝ պարտքի դիմաց» ծրագիրը։

Ֆեյսբուքում հրապարակված «Լևոն Քոչարյան VS Ռոբերտ Քոչարյան» տեսանյութում հայր և որդի անդրադառնում են բազմաթիվ թեմաների՝ ընտանեկան ավանդույթներից, ընտանիքի՝ Ստեփանակերտից Երևան տեղափոխվելու ցանկություն չունենալուց և Լևոն Քոչարյանի՝ քաղաքականության մեջ ներգրավվածությունից մինչև ժամանակակից տեխնոլոգիաներ, արհեստական բանականություն (ԱԲ) ու Հայաստանի ապագա։

Մեկնաբանելով Լևոն Քոչարյանի այն դիտարկումը, թե հանրության մի մասի շրջանում տարածված թյուր պատկերացումներից մեկն այն է, թե երկրորդ նախագահը «թալանել ու միլիարդներ է յուրացրել»՝ Ռոբերտ Քոչարյանը նշել է, որ եթե այդ լուրերի տակ որևէ հիմք լիներ, ապա պարզապես հիմարություն կլիներ վերադառնալ Հայաստան։

Ռոբերտ Քոչարյանը նշել է, որ կշտամբանքների առիթ հաճախ դառնում է իր նախագահության տարիներին Ռուսաստանի Դաշնության հետ իրականացված «Գույք՝ պարտքի դիմաց» ծրագիրը, ինչպես նաև Երևանի կոնյակի գործարանի (ԵԿԳ) վաճառքը Ֆրանսիային։ «Բայց չէ՞ որ գործարանն այստեղ աշխատում է, խաղողագործությունը զարգանում է, կոնյակն այստեղ է արտադրվում, հարկերն այստեղ են տալիս։ Մեղադրանքներն աբսուրդային են։ Երբեմն մտածում ես՝ խոսողն ընդհանրապես հասկանո՞ւմ է, թե ինչ է ներդրումային միջավայրը։ 100 միլիոնի պարտքը կուտակվել էր դեռ մինչև իմ գալը՝ Ատոմակայանի վերականգնման համար։ Պատկերացրեք՝ Հայաստանի իշխանությունները ոչ թե գույք են տալիս, այլ պարտքը մարում են բյուջեից։ Հետո Ռուսաստանն այդ նույն փողով գնում է հենց այդ նույն գույքը»,- նշել է Քոչարյանը։

Հիշեցնենք, որ ՀԱԷԿ-ի (Հայկական ատոմային էլեկտրակայանի) աշխատանքը դադարեցվել էր հենց Հայաստանի իշխանությունների նախաձեռնությամբ, որոնք տեղի էին տվել բնապահպանների պահանջներին։