Աղվան Վարդանյան. «Վատ է այն գեներալը, որը պատրաստ չէ երբեմն զինվոր դառնալ». Aravot.am

ԱԺ ՀՅԴ խմբակցության քարտուղար Աղվան Վարդանյանը Aravot.am-ի հետ զրույցում անդրադարձել է մամուլի հրապարակումներին, թե ինքը երազում է մշակույթի նախարար դառնալու մասին: Օրաթերթերից մեկն այսօր հրապարակել էր լուր, թե Աղվան Վարդանյանը, խոսելով նախարարի աշխատանքի մասին, ասել է. «Նախարարը մի այնպիսի պաշտոն է, որ ինչին կպնում ես, փող է դուրս գալիս։ Նույնիսկ սեղանիդ փոշին, որ ուզում ես թևով սրբես, գետնին թափես, հավաքում ես, վերջում տեսնում ես մի կապ կանաչ է, ու գետնին լցնելու տեղը գցում ես դարակդ»: Ի պատասխան Աղվան Վարդանյանն ասում է, որ նախարար երազելով չեն դառնում: «Ես քաղաքական ուժի ներկայացուցիչ եմ: Այդպիսի հարց մենք չենք քննարկել: Իսկ ընդհանրապես վատ է այն գեներալը, որը պատրաստ չէ երբեմն զինվոր դառնալ: Ինձ վերագրվող խոսքերի մասին. սուտ է ու զրպարտություն: Նման բան երբեք չեմ ասել: Լուսահոգի մեր պատգամավորներից մեկն էր ասում, որը նախարար չի էլ եղել»,- նշել է նա: Ինչ վերաբերում է նման տեղեկություններ տարածող լրատվամիջոցներին, Աղվան Վարդանյանը նշում է. «Թերևս ճիշտը դատի տալն է, բայց առնչվելիս կեղտոտվելու վտանգ գա: Մշակութային պատասխանեմ՝ … անհայրենիք, անսրբություն, անաղուհաց… (գտնել և կարդալ նաև բանաստեղծության առաջին տողը)»: