Կիմ Չեն Ընը վերահսկել է նոր hրթիռային համակարգերի փորձարկումները

ԿԺԴՀ-ում տեղի են ունեցել բազմանպատակ թեթև հրթիռների արձակման նոր համակարգի և համազարկային կրակի մարտավարական թևավոր հրթիռների համակարգի փորձարկումներ: Ինչպես հայտնել է Կորեայի կենտրոնական հեռագրական գործակալությունը (ԿԿՀԳ), Ազգային պաշտպանության ակադեմիայի պոլիգոնում կայացած միջոցառմանը հետևել է Պետական գործերի նախագահ Կիմ Չեն Ընը, հաղորդում է ՏԱՍՍ-ը:

Փորձարկումների ընթացքում ստուգվել են հատուկ մարտավարական բալիստիկ հրթիռի մարտական մասի հզորությունը, մեծացված հեռահարությամբ 240 մմ-անոց կառավարվող ռեակտիվ արկի նավագնացության հուսալիությունը, ինչպես նաև արհեստական բանականության տեխնոլոգիաների կիրառմամբ մարտավարական թևավոր հրթիռի ճշգրտությունը: Կիմ Չեն Ընը բարձր է գնահատել արդյունքները՝ դրանք անվանելով զգալի տեխնիկական առաջընթաց բանակի պաշտպունակության ամրապնդման գործում:

Հատուկ ուշադրություն է դարձվել նոր մարտավարական թևավոր հրթիռին, որը, ինչպես հստակեցնում է ԿԿՀԳ-ն, ընդունվելու է հարավային սահմանամերձ շրջանի հեռահար հրետանային բրիգադների սպառազինության մեջ: Այն համադրում է բարձր ճշգրտության նավագնացության համակարգը ԱԲ (արհեստական բանականության) տեխնոլոգիայի հետ՝ վերջնական ուղղորդման համար, և ընդունակ է խոցել թիրախները մինչև 100 կմ հեռավորության վրա՝ թռիչքի սավառնող և շարժիչային ռեժիմներում:

Կիմ Չեն Ընը նշել է, որ կրակի կառավարման համակարգերը և արձակման կայանքների ավտոմատիկան ամբողջությամբ արդիականացվել են՝ հաշվի առնելով ժամանակակից մարտի պայմանները, ինչն ապահովել է նոր սպառազինությունների ավտոմատացված, հեռահար և բարձր ճշգրտության բնութագրերը: Նա ընդգծել է, որ «մեծ կործանարար ուժի տիրապետումը պատերազմի զսպման անհրաժեշտ պայման է», քանի որ այն ինքնին «թշնամիների մոտ ծայրահեղ տագնապ և վախ է առաջացնում»:

Հյուսիսային Կորեայի առաջնորդը հայտարարել է ինչպես միջուկային, այնպես էլ սովորական զինված ուժերի արագընթաց ամրապնդմանն ուղղված կուսակցության և կառավարության կուրսի անփոփոխելիության մասին: Նա հանձնարարել է պաշտպանական գերատեսչություններին արագացնել գերժամանակակից սպառազինությունների արտադրությունը՝ ինքնիշխանությունն ու սոցիալիզմի զարգացումը երաշխավորելու համար:

Միջոցառմանը մասնակցել են բարձրաստիճան զինվորականներ, այդ թվում՝ պաշտպանության նախարարի խորհրդական, մարշալ Պակ Չոն Չհոնը և Հրթիռաշինության գլխավոր վարչության ղեկավարությունը: Փորձարկումներն իրականացվում են ազգային պաշտպանության զարգացման հնգամյա պլանի շրջանակներում, որն ուղղված է նաև հրետանային և հրթիռային ուժերի արդիականացմանը: