Երաշխիքը մեր ուժն է. Իսմայիլ Բաղայի
Իրանի ԱԳՆ խոսնակն, անդրադառնալով ԱՄՆ-ի կողմից հնարավոր պայմանավորվածությունների պահպանման երաշխիքների վերաբերյալ հարցին, հայտարարել է. «Երաշխիքը մեր ուժն է և այն դասը, որը Իրանի ժողովուրդն արդեն տվել է ագրեսորներին»։
Նա ընդգծել է, որ «մեր պատվիրակության պատրաստվածությունը հենց Իրանի ժողովրդի պատրաստվածությունն է»՝ հավելելով, որ իրանական բանակցային խումբը պետական համակարգի անբաժան մասն է։
Նրա խոսքով՝ բանակցությունների ներկա փուլը կենտրոնացած է հակամարտության ավարտի վրա, և այս պահին միջուկային մանրամասները չեն քննարկվում։
Նա նաև նշել է, որ սպառնալիքներն ու քաղաքական ծաղրանկարները մյուս կողմի քաղաքական գործելակերպի մասն են, մինչդեռ Իրանը գործում է իրական իրավիճակից ելնելով՝ անկախ հակառակորդների հայտարարություններից։
Պատասխանելով այն հարցին, թե ինչու ԱԳ նախարարն ու նախագահը չեն արձագանքում Թրամփի սպառնալիքներին, նա ասել է. «Մենք շատ ավելի կարևոր գործերով ենք զբաղված, քան թվիթերին ու նկարներին պատասխանելը։ Մենք կենտրոնացած ենք ազգային շահերի պաշտպանության վրա»։
Նա ընդգծել է, որ Իրանը հետևում է իր սեփական մոտեցմանը. «Մենք գործում ենք մեր ոճով՝ որպես քաղաքակիրթ Իրան, և չենք պատճենում մյուս կողմի գործելակերպը»։
Հետևեք մեզ Viber-ում
