Թող ոչ մի «զոհ» չպահանջվի Կարեն Կարապետյանից բացի

Վերջին շրջանում Գագիկ Ծառուկյանն ու ողջ թիմը հասցրեցին հավատարմություն հայտնել Սերժ Սարգսյանին, Ծառուկյանը հասավ մինչեւ նախագահական՝ չհանդիսանալով ԱԺ խորհրդի անդամ, ապա ժամանեց խորհրդարան, որպեսզի հայտարարի, որ չի բացառվում, որ սատարեն ՀՀԿ-ի թեկնածուին, որ չեն միանա Ելք-ի՝ գնաճի դեմ նախաձեռնած երթին եւ այլն եւ այլն։ Սակայն պարզվում է Ծառուկյանն ու իր թիմը գոհ են ոչ թե իշխանությունից ամբողջությամբ, այլ Սերժ Սարգսյանից, կամ ավելի ճիշտ՝ դժգոհ են Կարեն Կարապետյանից, որի դեմ աննախադեպ գրոհ ձեռնարկեցին Ազգային ժողով-Կառավարություն հարցուպատասխանի ժամին։ Հարց տալու համար այս խմբակցությունից հերթագրվեցին ոչ ավել, ոչ պակաս ութ պատգամավոր ու կրակահերթի տակ պահեցին Կարապետյանին ու իր կառավարությանը՝ աջ ղեկով ավտոմեքենաների խնդրից սկսած, վերջացրած գնաճի ու համայնքների սոցիալական խնդիրներից։ Ծառուկյանի թիմում «թող ոչ մի զոհ չպահանջվի, վարչապետից բացի» տրամադրություններ են։ Մեկումեջ էլ կրակի տակ վերցվեցին ՀՅԴ-ական նախարարները, ի դեպ, տեղեկություններ կան, որ ընդդիմադիր ամենամեծ խմբակցությունում խանդով են վերաբերվում ՀՅԴ-ականներին, որոնք կոալիցիայի անդամ են եւ կշարունակեն նաեւ ապրիլից հետո, մինչդեռ Սերժ Սարգսյանը իրենց մասով դեռ որոշում չունի, իսկ այստեղ այնքան են հոգնել ոչ ընդդիմություն, ոչ իշխանություն կարգավիճակից։ Սերգեյ Բագրատյանը Դավիթ Լոքյանից հետաքրքրվեց Հայաստանի մարզերում տիրող իրավիճակի մասին. «Խոշորացված համայնքները օգնություն չեն ստանում, տեղական բյուջեները շատ փոքր են, Կառավարությունը ակտիվ քաղաքականություն չի իրականացնում, աշխատատեղեր չի ստեղծում, որևէ գործիքակազմով պատրաստ չէ աջակցել գյուղացուն: Մարզերի և Երևանի անհամաչափ զարգացման պատճառով մենք մեծ գլխով և հյուծված մարմնով պետություն ենք կառուցում»։ Պատգամավորի տեսակետների հետ չհամաձայնեց Տարածքային կառավարման և զարգացման նախարար Դավիթ Լոքյանը։ Բագրատյանը անցավ «բլիժնի բոյի», ասելով, որ գյուղերում շրջելու փոխարեն՝ ընդամենը աշխատում են կաբինետում նստած, ինչի հետևանքով էլ ստեղծվել է նման իրավիճակ: Պատգամավորը Կառավարությանը մեղադրեց բոլոր խնդիրների լուծումը հետագային թողնելու քաղաքականության մեջ: Դավիթ Լոքյանն, ի պատասխան Բագրատյանի դիտարկումների՝ պահանջեց հարց ձևակերպել, ինչին ի պատասխան՝ պատգամավորը նշեց. «Կառավարության միակ պրոբլեմը, փաստորեն, այն է, որ ես հա՞րց ձևակերպեմ, իմ ամեն մի ասածը մի հարց է: Դուք պատասխանատու եք գյուղացու կողքին չլինելու համար»: Բագրատյանի մեղադրանքներին ի պատասխան՝ Լոքյանը խորհուրդ տվեց իրեն գյուղացու կողքին չինելու մեջ չմեղադրել. «Ինչ մնում է հարցին, որ նախարարները կաբինետներում են, գոնե այդ հարցում ինձ չեք կարող ասել»: Խմբակցության պատգամավոր Շաքե Իսայանն էլ վարչապետ Կարեն Կարապետյանին հարցրեց գնաճից եւ հիշեցրեց, որ ԱԺ-ում կառավարության ներկայացուցիչները վստահեցնում էին, որ գնաճը կառավարելի է, մինչդեռ պարզ երեւում է, որ խնդիրներ կան, անգամ խորհրդարանական լսումներ են անցկացվելու այդ թեմայով: Նա հարցրեց՝ կառավարությունը այնքան հոտառություն եւ քաղաքական հեռատեսություն չունե՞ր, որ Հարկային օրենսգիրքը բերեց հոկտեմբերին եւ չգիտեր, որ այսքան թանկացումներ կլինի, թե՞ լուծումներ իրականում չունի: Կարեն Կարապետյանը պատասխանեց. «Միանգամից գնահատական եք տալիս՝ անկանխատեսելի, անկառավարելի գնաճ: Ամեն ինչը համեմատության մեջ է: Մեր օֆիցիալ գնաճը 2,6 տոկոս է, 6.7 տոկոս Վրաստանում է, 7.9 տոկոս Ադրբեջանում է: Գնաճը այսպես, թե այնպես հաշվել՝ կա բանաձեւ: Ինչ վերաբերվում է դիզվառելիքի, բենզինի եւ գազի գնի թանկացմանը, ուզում եմ հետեւյալ վիճակագրական տվյալները ձեզ տամ՝ բենզինը թանկացել է 20 դրամով՝ 430 դրամ է, այս պահին Վրաստանում նույն բենզինի գինն ավելի բարձր է, երբ որ մենք այն բերում ենք տրանզիտով Վրաստանից: Բենզին օգտագործողը ալտերնատիվ ունի գազ օգտագործի, եթե իր համար հարմարավետ չի, կարող է անցնել գազի: Գազը թանկացել է 25 դրամով, այսօր այն 190-220 դրամ է, վերականգնվել է այն գինը, որը եղել է 2015-ին: Լավ չի, որ թանկացել է գազի գինը, լավ կլիներ հինը մնար՝ այո, բայց 220 դրամը նոր պահանջ չի, նոր մարտահրավեր չի շուկայում: Շուկայում այս գներով մենք ժամանակին աշխատել ենք եւ էժանացրել ենք այն ժամանակ, երբ հնարավորություն ենք ունեցել: Էժանացրել ենք ջերմոցների, վերամշակողների համար նույնպես, որպեսզի այդ բիզնեսը կայանա: Դա չի բացառվում, որ երբ մի պահ գա, որ զգանք՝ այդ բիզնեսը կայացել է եւ զիջումների հնարավորություն չունենք՝ վերականգնվի: Միեւնույն ժամանակ 220 դրամի դեպքում Վրաստանում նույնպես մենք ունենք սակագին 260-310 դրամ: Դիզելային վառելիքի ակցիզային հարկը մենք նվազեցրել ենք, կիրառում ենք ԱԱՀ: Այս պահին այդ սակագինը որոշվում է հին ակցիզայինով եւ ակցիզային հարկով, բայց այն հիմնականում օգտագործում են բիզնեսի համար: Բիզնեսը, որը ԱԱՀ է վճարում, դիզվառելիքի այս սակագնից շահում է»: Նա ասաց, որ միայն գյուղատնտեսության համար բեռ կարող է հանդիսանալ դիզվառելիքի սակագնի ավելացումը: Վարչապետն ասաց, որ քննարկում են տարբերակներ, որ սուբսիդավորեն գյուղատնտեսությունը. «Որեւէ պրոբլեմատիկ խնդիր այս երեք ապրանքատեսակների դեպքում ես չեմ տեսնում»: Նկատենք, որ Կարապետյանը բավական մարտական էր տրամադրված եւ նետվում էր պատասխանելու բազում հարցերի։ Էդմոն Մարուքյանն էլ հարցրեց, թե ինչու նա Ամանորի տոներից անմիջապես հետո արձակուրդ գնաց:«Այսինքն՝ դուք մարդկանց կոչ եք անում հաջորդ տարվա հունվարի 3-ից գալ աշխատանքի, և դուք արձակուրդի մեջ եք գտնվում», ասաց Մարուքյանը՝ հավելելով, որ վարչապետի խոսքն ու գործը չեն համընկնում: «Այո, ես ճիշտ եմ ասել, պետք է մինչև ամիս 3-ը հանգստանանք, բայց ես չեմ ասել, որ մարդ իրավունք չունի արձակուրդ գնալու՝ մեր օրենսդրության համապատասխան: Ի գիտություն ձեզ՝ ես սեպտեմբերից աշխատելով՝ արձակուրդում եղել եմ 8 օր՝ 3 օր ամռանը, 5 օր՝ հունվարին: Իրավունք ունե՞մ, թե չէ»,- արձագանքեց Կարեն Կարապետյանը: Նա հավելեց, որ հաջորդ տարվա հունվարի 3-ին դուրս կգա աշխատանքի, թե հունվարի 8-ին՝ ևս 5 օր արձակուրդ վերցնելով, դա իր իրավունքն է: Անի Սահակյան