Շուշանն  «ահաբեկչության» նոր հարթակ է գտել

Երգչուհի և պատգամավոր Շուշան Պետրոսյանն  Ազգային ժողովի հայտարարությունների ժամին պաթետիկ հայտարարություն է կարդացել` նվիրված  հային, սիրուն, Հայքին ու… Աստված գիտե, թե ում: Թե ում էր ուղղված  հայտարարությունը, ով կամ ինչն էր թիրախը, առաջին դիտումից դժվար էր հասկանալը: Առավել դժվար, թե ինչն էր այդքան հուզել երգչուհի-պատգամավորուհուն , ով մելամաղձոտ կրքոտ ձայնով  ամբիոնից մենախոսությամբ էր զբաղված, ինչպես հնդկական սերիալներում  են դերասանները նման ասմունքներով ժամանակ  սպանում . «Մեկ ազգ մեկ բանակը պլակատ չի, կենսակերպ է, Արցախն էլ Հայաստան է, ու վերջ: Ուրեմն՝ Հայաստան-Արցախը մեր հայրենիքի մի զինավանն է, ու բոլորս այստեղ զինվոր ենք, մենք՝ հայերս, ու բոլորը՝ եզդիները, ասորիները, մալականները, որ Հայաստանում են ապրում, բոլորս զինվոր ենք։ Մենք ապրել ենք այստեղ, միշտ ենք ապրել: Հայքը փոքրացել է, բայց կա։ Մենք կանք ու նույն տեղում ենք, Արարատը վկա։ Սիրո՞ւմ ես երկիրդ, ուզո՞ւմ ես երկիրդ ոտքի կանգնի, քո ամբիցիաներից ավե՞լ, դրանից շա՞տ ես սիրում երկիրդ, քո հարմարավետությունից, ապահովությունից ավե՞լ, ուրեմն մի գոռա, այդպես չեն սիրում։ Հատկապես, որ չի բացառվում, որ մի օր, մի քանի օրից էլ երկրիդ հանդեպ գովաբանության գոռոցը ուրիշ բեւեռից լսվի։ Հանգի՜ստ:Աղմկոտ սերը թիթեռի կյանք ունի ու հայն ու Հայքն իր ակունքով արմատներով ու իմաստնությամբ անհաղորդ են նման սիրուն։ Երկիրդ սիրելը հայելու առջեւ, մենակ գոնե ինքդ քեզ հետ ազնիվ լինելու նման է, նայիր աչքերիդ, տես սիրտդ, ապրածդ քննիր ու սկսիր քեզնից։ Երբ երկրիդ հողին կանգնած ես, ու զգում ես, որ իր շարունակությունն ես, որ բողբոջել ես, որեւէ եվրազիափարթներշիփ, Ջորջ Սորոս, ֆլան-ֆստան ի զորու չեն կանխելու ծաղկունքդ, ուրեմն արմատդ փնտրիր, որ քայլերդ արդարացվեն»: Սովորաբար երգչուհին փոթորկահույզ է դառնում, երբ քննադատում են Հայոց բանակին , նման դեպքերում նա կորցնում է ինքնատիրապետումը: Այդ հողի վրա  Շուշան Պետրոսյանը մի քանի ահարկու ճակատամարտ է տվել   սոցիալական ցանցերում:  ԱԺ էթիկայի հանձնաժողովը անգամ քննության էր առնել Շուշանի  <<ահաբեկչական>> գրոհներից մեկը, երբ  վերջինս մի քաղաքացու սպառնացել էր աչքերը հանել: Կար ժամանակ, երբ տիկինը ոչ մի կերպ չէր կարողանում զսպել իր կրքերը, իսկ լեզուն՝ հատկապես: Խորհրդարանի ամենալռակյաց պատգամավորներից մեկը Ֆեյսբուքի սահմաններում դառնում էր անկառավարելի ծանր հրետանի, իսկ դրանից դուրս շարքից դուրս եկած զենք, որը փախուստի էր դիմում, երբ որեւէ լրագրող հարցով դիմում էր ՀՀԿ-ի  արտիստիկ պատգամավորին: Եւ ահա, տիկին Պետրոսյանը որոշել է դուրս գալ Ֆեյսբուքի սահմաններից եւ ասելիքը հնչեցնել ավելի բարձր ու պատասխանատու ամբիոնից, բայց այստեղ ակնհայտ է ընդունակությունների լուրջ դեֆիցիտ, որի պարագայում այլ բան չէր մնում, քան գործի դնել դերասանական բբովանդակազուրկ տաղանդը: Անի Սահակյան