ԱՄՆ-իսրայելական պшտերազմն Իրանի հետ ամբողջ աշխարհի ընկերություններին առնվազն 25 միլիարդ դոլար է արժեցել

ԱՄՆ-ի ու Իսրայելի հակամարտությունն Իրանի հետ այս պահի դրությամբ համաշխարհային բիզնեսին արդեն առնվազն 25 միլիարդ դոլար է արժեցել, և վնասի չափը շարունակում է աճել։ Այս մասին հայտնում է Reuters գործակալությունը՝ հղում անելով ԱՄՆ-ի, Եվրոպայի և Ասիայի բորսաներում ներկայացված ընկերությունների կորպորատիվ տեղեկատվության վերլուծության արդյունքներին։

Ընկերությունները բախվել են էներգակիրների գների կտրուկ աճի և մատակարարման շղթաների խզման հետ՝ Հորմուզի նեղուցում տիրող իրավիճակի պատճառով, նշում է գործակալությունը։

Առնվազն 279 ընկերություն իրանական հակամարտությունն անվանել է արտակարգ միջոցներ ձեռնարկելու պատճառ, ներառյալ գների բարձրացումը և արտադրության կրճատումը։ Մյուսները կասեցրել են դիվիդենտների վճարումը կամ բաժնետոմսերի հետգնումը, աշխատակիցներին ուղարկել են չվճարվող արձակուրդ, ներդրել են վառելիքի հավելավճարներ կամ դիմել են պետական օգնությանը։

Գործակալության ուսումնասիրության մեջ ներառված ամեն հինգերորդ ընկերությունը՝ կոսմետիկա արտադրողներից մինչև կրուիզային օպերատորներ ու ավիաընկերություններ, հայտարարել է զինված հակամարտության պատճառով կրած ուղղակի ֆինանսական կորուստների մասին։ Այս թվից ընկերությունների մեծ մասը տեղակայված են Եվրոպայում և Մեծ Բրիտանիայում, որտեղ էներգակիրների գները առանց այդ էլ բարձր էին։ Եվս մեկ երրորդը՝ Ասիայում է։ Սա մատնանշում է այս տարածաշրջանների լուրջ կախվածությունը մերձավորարևելյան նավթամթերքից։

Ծախսերի ամենամեծ բաժինը քանակական արտահայտությամբ բաժին է ընկնում ավիաընկերություններին, քանի որ ավիավառելիքի գները կրկնապատկվել են. դա կազմում է գրեթե 15 միլիարդ դոլար։

Գործակալությունն ընդգծում է, որ կորուստներ են սկսում կրել նաև այլ ոլորտների ավելի ու ավելի շատ ընկերություններ։ Այսպես, P&G-ն ակնկալում է հարկումից հետո շահույթի կրճատում՝ 1 միլիարդ դոլարի չափով։